هه‌ولێر -KDP.info- به‌ڕێوەبه‌ری ڕێگاوبانی هه‌ولێر گوتی، ده‌ست به ته‌واوكردنی 60 پڕۆژه‌ی دروستكردنی ڕێگاوبانی نوێ له سنووری هه‌ولێر كراوه، كه ته‌واو نه‌كرابوون. ئەو پڕۆژانە بڕی یه‌ك ترلیۆن دیناریان تێ دەچێت و به‌شێک له‌وانه ڕێگای ستراتیژین.
به‌ڕێوەبه‌ری ڕێگاوبانی هه‌ولێر، محه‌مه‌د مه‌هدی، بۆ ماڵپه‌ڕی فه‌رمیی پارتی دیموكراتی كوردستان گوتی: "ئه‌و پڕۆژانه‌ی كه دانرابوو له سنووری هه‌ولێر نۆژه‌ن بكرێنەوە، هه‌موویان ته‌واو كراون و ئێستا ئه‌وله‌ویه‌ت بۆ ئه‌و پڕۆژانه‌یه كه كاتی خۆی به‌هۆی قه‌یرانی داراییەوە ته‌واو نه‌كرابوون و ده‌ست به ته‌واوكردنیان ده‌كرێت، چونكه هه‌موو پڕۆژەکانی دروستكردنی ڕێگای نوێ و به‌جووتسایدكردنی ڕێگاكان ته‌واو ده‌كرێن."
محه‌مه‌د مه‌هدی گوتیشی: "نزیكه‌ی 60 پڕۆژه هه‌بوون، ته‌واو نه‌كرابوون، كه پڕۆژه‌ی گه‌وره و بچووكن و كۆی پاره‌ی پڕۆژه‌كان نزیكه‌ی ترلیۆنێك دیناره و له ساڵی نوێ هه‌مووان ته‌واو ده‌كرێن."
مه‌هدی باسی له‌وه‌ش كرد: "به‌شێك لەو پڕۆژانه، تونێلی پیرمام و ڕێگای هه‌ولێر_كۆیه و ڕێگای چۆمان_حاجی ئۆمه‌ران دەگرێتەوە، كه ئه‌مانه ڕێگای ستراتیژین و بڕیاره ته‌واو بكرێن. جگه له‌وه‌ش، ڕێگاكانی گونده‌كان چاك ده‌كرێن و ئه‌وانه‌ی یه‌كسایدن ده‌كرێنه دووساید."
گوتیشی: "بڕیاره له هه‌ولێر تا ده‌گاته حاجی ئۆمه‌ران سه‌رجه‌م ڕێگاكان بكرێنه دووساید."
بڵند ئیبراهیم