شەفەق نیوز/ پارێزگای سەڵاحەدین، ئمڕوو چوارشەممە، باس هووکارەیل بڵاو بوین و بەرزەوبوین تووشهاتنەگان وە ڤایڕۆس کۆڕۆنا کرد، ک تاوان رەفتارو رسوومە کۆمەڵایەتیەگانە و جیوازی لە جیوەجیکردن قەیەغە مقەیەتیەگە وە گەرد کەم هووشیاری تەندروسی.
ئیسماعیل هەلوب جیگر یەکەم پارێزگارسەڵاحەدین ئەرا ئاژانس شەفەق نیوز وت: زاقترین هووکارەگان لە بەرزەوبوین تووشهاتنەگان وە کۆڕۆنا خوەی گردەو بوینە هووزیەگان و بوونە ئایەنیەگانە ک هیمان لە پارێزگاگە باوە، هرچەن کۆڕۆنا مەترسیدارە، وەگەرد گواستنەوەی پەتاگە لە ری سەردانکەرەیل پارێزگاگە لە دەیشت و ناو وڵاتەگە.
وتیش لە بان بەسانن شوونە گشتیەگان و شوونەیل گردەوبوین لە پارێزگاگە، وەلی هیمان فەرەی دانیشتوەیل پابەند نەوین وە ریکارە مقەیەتیەگان، و هه‌میش سەردانی کەن، ک یه بویە هەلقوڵان گەورایگ لە هەژمار تووشهاتنەگان، دویای ئەوەگ پارێزگاگە ئەرا ماوەی دوو مانگ کۆڕۆنا نه‌یاشت .
هەلوب ئاماژەدا ئەرا جیوازی لە جیوەجیکردن قەیەغە مقەیەتیەگە لە کەرتە ئیداریەگان، ودیاری کرد ک بەشیگ لە وەرپرسەیل پابەند بوی وە قەیەغەگە و وەشیوەیگ گونجیاگ هاوردەی جی، و ئەوەکان قەیەغەگە وەجی ناوردن، مەگەر وە چەودیری سەخت لە لایەن شانەی قەیرانەگە.
هەمیش وت: رەفتارکردن فرەی لە خەڵک پارێزگاگە وەل کۆرۆنا لە خوار ئاست خواست خوه‌ی بوی، لەوەر کەم هووشیاری تەندروسی و پاپا نەوین لە مەترسی پەتاگە و کاریگەریە خراوەگەی لەبان گشت ووردەکاریەیل ژیان.
جی باسە ک پارێزگای سەڵاحەدین لە ماوەی هەفتەیل دویایی هەلقوڵان گەورایگ وە تووشهاتن کۆڕۆنا وەخوەی دی، وەگورەی دویاترین ئامار دویەکە، هەژمار تووشهاتنەگان رەسیە ٤٢٦ تەنیا لە ماوەی ٢٤ ساعەت.