شەفەق نیوز/ ئەرا یەکەم جار، دویای دەور ٤ مانگ لە بڵاوبوین ڤایڕۆس کۆڕۆنا لە ئەمریکا، سەرۆک دۆناڵد تڕامپ لە شوونیگ گشتی وە دەمامەکەو دیاردا.
تڕامپ دەمامەکیگ پزشکی دانا، لەوەخت سەردان ناوەندیگ پزشکی لە پایتەخت ئەمریکی، ئەویش دویای قسەوباس فرەیگ لە وەکارنەهاوردنی ئەرا دەمامەک.
وەیەوە تڕامپ وەڵام ئەو قسه‌یلە دا تا بوودە نموونەیگ لە چین تەندروسی گشتی، وەگەرد سەختەوبوین تووشهاتنەگان وە ڤایڕۆس کۆڕۆنا لە ناوچەگان ئەمریکا.
تڕامپ لەناو خەسەخانەی '' واڵتەر ریید'' سەربازی لە دەیشت واشینتون وه‌ختێگ ریکرد، دەمامەک سیایگ ها بان دەمچەوی، وەرجە چەوپیکەفتن وه‌ل سەربازەیل کۆنیگ تووشهاتگ، وەگورەی '' فڕانس پڕیس'' لە گرتەیلیگ تەلەفزیۆنی.
وەرچە چەن رووژیگ، ئەلیکس عازار وەزیر تەندروسی و خزمەت مرۆیی ئەمریکی، وت: رەوشە ئاوارتەگان ئەرا سەرۆک دۆناڵد تڕامپ خوەی هووکارە لە وەکارنەهاوردن دەمامەکی، هەرچەن حکومەتەگەی هان هاووڵاتەیل دەێد وەئەوە.
لە قسەگەی لە باوەت بەرزەوبوین ناکاوی لە هەژمار تووشهاتنەگان وە ڤایڕۆس کۆڕۆنا لە ئەمریکا، عازار وت: بایەسە مەردم کۆنتڕۆڵ رەفتار خوەیان بکەن، وە دویرەکەفتن کۆمەڵایەتی و وەکارهاوردن دەمامەک وەگورەی توانا.
بەڵکم عازار، وگورەی ''ئەسۆیشید پڕیس''وت؛ تڕامپ ناچار نیە لە وەجیهاوردن رینمای وەڕەیەوبردنەگەی خوەی، چوونکە خوەی سەرکردەیگە ئەرا جهان ئازاد، وەردەوام تاقینەوە کریەێد، و ئەویش هالە رەوشیگ لە ئیمە جیوازترە .
تڕامپ تاریف وەکارهاوردن دەمامەک پزشکی دا ئەرا نواگردن بڵاوبوین کۆڕۆنا، و لە هەمان وەخت دووپات کرد ک خوەی وەتەواوی هاوەگەرد دەمامەک پزشکی، ئەویش هەرچەن خوەی دەمامەک وەکار ناوردیاد.
سەرۆک تڕامپ وت: وەکارهاوردن دەمامەک نێەوودە گرفتیگ ئەرا خوەی، و دووپاتکرد لە مەزەنەی خوەی ک ڤایڕۆس کۆڕۆنا وە ماوەیگ وەیەکجار نیمەنێدەی.
تڕامپ ئەرا ماڵپەڕ ''فۆکس بیزنس'' وت؛ دەمامەک نێوودە گرفتیگ ئەرا خوەی، ئەگەر نزیک مەردم بووم وەکاری تێەرم.