شەفەق نیوز/ فەرماندەی حەشد شەعبی لە پارێزگای دیالە، ئمڕوو دووشەممە، راگەیان لە ئارامکردن ئاوایەیلیگ لە ناوچەی باکوور موقدادیە ئەرا هاتنەوەی ئاوارەگان دویای پاکەوکردنی وە ئۆپراسیۆن ''پاڵەونەیل عراق'' ک وەرجە سێ رووژ دەسکردەپی.
عەقید ئەحمەد حسێن سەعدون فەرماندەی لیوای ٢٤ ئەرا ئاژانس شەفەق نیوز وت: لیواگان حەشد شەعبی و لەری ئۆپراسیۆن چینی وناکاوی، تویەنست ٣٦ ئاوای ئارام بکەێد لە ناوچەیل حەوز حەمرین و حنبس لە باکوور قەزای موقدادیە، ک دانیشتویەلی کۆچ کردن لە وەخت جەنگ وه‌ل داعش له ساڵ ٢٠١٤ .
سەعدون دووپاتکرد ک حەشد شيعبی ئەرک ئەمنی و مرۆیی خوەی ئەنجامدا ئەرا هاوردنەوەی ئاوارەگان و چەوڕی تەواوکردن گامە خزمەتیەگان کریەێد ئەرا ئاوادانکردن ئاوایە ئاوارەگان و هاتنەوەی چالاکیە کشتوکاڵیەگە. ئاماژەدا ک هێزەیل حەشد وە هەماهەنگی وەل کەرتە ئەمنیەگان چیە ناو شوونەیل مەترسیداریگ ک پەنای ئارامیگ بوی ئەرا داعش.
فەرماندەی ئۆپراسیۆنە هاوبەشەگان، پیرەکە، راگەیان دەسکردن وە ئۆپراسیۆن قۆناغ چوارم پاڵەوانەیل ، ئەرا پاکەوکردن ناوچەیل ناوبەین دیالە و کوردستان، و ناوچە سنوریەگان وەگەرد ئیران، وە سەرپەرشتی موستەفا کازمی سەرۆک وەزیران.