خەندان-
وەزیری کارەبای حکومەتی هەرێمی کوردستان رایگەیاند، بڕیارە بەمنزیکانە تیمەکانی وەزارەت بەهاوکاری کۆمپانیا پسپۆرەکانی تایبەت بە کاری چاککردنەوەی یەکەکانی وێستگە کارۆئاوییەکان دەست بەکارەکانی چاککردنەوە لەهەردو وێستگەی بەنداوی دوکان و دەربەندیخان بکەن.
وەزارەتی کارەبای حکومەتی هەرێمی کوردستان بڵاویکردەوە، ئەمڕۆ ئەندازیار کەمال محەمەد لەگەڵ بریکارو راوێژکاران و بەڕێوەبەرانی گشتی کارەبا کۆبوەوە و باسی لە گرفت و کێشانە کرد کە لەچەند هەفتەی رابردودا روبەڕوی سێکتەری بەرهەمهێنان و دابەشکردنی کارەبا بوەتەوە، بەهۆی هەڵکشانی خێرایی خواستی کارەبا.
بەمنزیکانە تیمەکانی وەزارەت بەهاوکاری پسپۆرەکانی تایبەت بە کاری چاککردنەوەی یەکەکانی وێستگە کارۆئاوییەکان دەست بەکارەکانی چاککردنەوە لەهەردو وێستگەی بەنداوی دوکان و دەربەندینخان دەکەن
ئەوەش خراوەتەڕو، وەزیری کارەبا گوێبستی بەڕێوەچونی کارەکانی جێبەجێکردنی هەردو پرۆژەی سکادا و دانانی وێستگەیەکی 165 مێگاواتی کارەبا بو لەسەرقەڵا لە ئیدارەی گەرمیان، بۆ ئەم مەبەستە هەرسێ بەڕێوەبەرایەتی گشتی بەرهەمهێنان و گواستنەوەو کۆنترۆڵی کارەبای راسپارد بۆ سەرپەرشتیکردن و رێکخستنی لایەنی تەکنیکی و هونەری تاوەکو لەدوای تەواوبونی دانانی وێستگەکە کە بڕیارە 8 مانگ بخایەنێت.
پێویستە سەرجەم کۆمپانیاکانی کارەبا پابەندی مەرج و رێنماییەکانی وەزارەت بن و هەروەک چۆن وەزارەتی کارەبا کارئاسانی و هاوکاریی هەموو کۆمپانیاکان دەکات
لە راگەیەندراوەکەدا ئەوەش خراوەتەڕو، تەوەرێکی دیکەی کۆبونەوەکە تایبەت بو بە پرۆژەی وێستگەی هەڵمی خەبات کە وەزارەت توانی لەماوەی رابردودا 200 مێگاوات کارەبای لێ بەرهەمبهێنێت و بڕیاریشە بەمنزیکانە کۆمپانیا جێبەجێکارەکانی وێستگەی خەبات پرۆژەکە رادەستی وەزارەتی کارەبا بکەن.