خانه‌قین -KDP.info- به‌رپرسی لقی15ی پارتی دیموكراتی كوردستان له خانه‌قین گوتی، به‌پێی بڕیارێكی نوێ، دانیشتووانی نۆ گوندی كوردنشینی ده‌وروبه‌ری خانه‌قین ناونووس ده‌كرێن و بە كۆچبه‌ر هه‌ژمار ده‌كرێن، بۆ ئه‌وه‌ی ده‌ریان بكه‌ن و عه‌ره‌ب له شوێنی ئه‌وان نیشته‌جێ بكه‌ن، کە ئه‌مه جۆرێكی نوێی ته‌عریبه.
به‌رپرسی لقی15ی پارتی دیموكراتی كوردستان له خانه‌قین، شێخ جه‌عفه‌ر شێخ مسته‌فا، بۆ ماڵپه‌ڕی فه‌رمیی پارتی دیموكراتی كوردستان گوتی: "له پارێزگای دیاله نووسراوێكیان ده‌ركردووه، كه باس له‌وه ده‌كات ئه‌و گوندانه‌ی ده‌وروبه‌ری خانه‌قین كه دانیشتووانه‌كه‌یان كوردن، له لایه‌ن فه‌رمانگه‌ی كۆچ و كۆچبه‌رانی خانه‌قینەوە ناونووسیان بكه‌ن وه‌كو كۆچبه‌ر، بۆ ئه‌وه‌ی ده‌ربكرێن و له شوێنی ئه‌وان عەرەب نیشته‌جێ بكه‌ن."
شێخ جه‌عفه‌ر شێخ مسته‌فا گوتیشی: "گونده‌كانیش بریتین لە گونده‌كانی مه‌ردان و شێرك و حوسێنمه‌مه و محه‌مه‌د شێرك و عه‌زیز و ڕه‌مه‌زانه و شه‌فیق و جه‌میل به‌گ و ئه‌حمه‌ده، بۆ ئه‌وه‌ی بزانن ژماره‌یان چه‌نده و به كۆچبه‌ر حیسابیان بكه‌ن و له گونده‌كان ده‌ریان بكه‌ن، ئەمه‌ش جۆرێكی دیكه‌ی ته‌عریبه."
شێخ مسته‌فا باسی له‌وه‌ش كرد: "سه‌ره‌ڕای ئه‌وه‌ی دۆخی ئه‌منیی خانه‌قین خراپه و داعش سه‌ری هه‌ڵداوه‌ته‌وه، ئه‌وان هه‌ر خه‌ریكی ته‌عریبكردنن و پێشتریش 40 گوند به‌هۆی خراپیی دۆخی ئه‌منییەوە چۆڵ كراون."
بڵند ئیبراهیم