دیجیتاڵ میدیاى سپێده
دەسەڵاتی فڕۆكەوانیی عێراق گەشتە ئاسمانییەكانی لەگەڵ وڵاتی هیندستان ڕاگرت، ئەمەش بە هۆی بڵاوبوونەوەی خێرای پەتای ڤایرۆسی كۆرۆنا لەم وڵاتە.
ئەمڕۆ سێ شه‌ممه 27/4/2021، وەزارەتی گواستنەوە و گەیاندنی عێراق و كۆمپانیای گشتیی هێڵی ئاسمانیی عێراق رایانگەیاند كە تەواوی گەشتە ئاسمانییە راستەوخۆكانی نێوان عێراق و هیندستان لەمڕۆ سێشەممەوە ڕادەگیرێن تا كاتێكی نادیار.
ئاماژەشیان بەوە داوە كە بڕیارەكەیان بەپێی ڕێنماییەكانی ئەنجوومەنی وەزیرانی عێراق و دەسەڵاتی فڕۆكەوانیی مەدەنیی عێراقیە بەهۆی ئەوەی هیندستان چووەتە قۆناغێكی مەترسیدارەوە لە ڕووی بڵاوبوونەوەی پەتای ڤایرۆسی كۆرۆنا.
جێی باسە ماوەی پێنج ڕۆژە هیندستان كەوتووەتە باری ئەوپەڕی مەترسیدارییەوە لە ڕووی ڕێژەی نوێی تووشبووانی پەتای ڤایرۆسی كۆرۆناوە و ئێستا سوپای وڵاته‌كه هاوكاریی تیمه‌كانی ته‌ندروستی دەكات بۆ ڕووبەڕووبوونەوەی پەتاكە.