بەرپرسی ڕاگەیاندنی بەڕێوەبەرایەتیی گشتیی كاروباری مین لە گەرمیان، تەقاندنەوەی ژمارەیەكی زۆر تەقەمەنیی لەلایەن تیمەكانی بەڕێوەبەرایەتییەكەوە ڕاگەیاند.
ئاكۆ محەمەد، بەرپرسی ڕاگەیاندنی بەڕێوەبەرایەتیی گشتیی كاروباری مین لە گەرمیان، بە (باسنیوز)ی ڕاگەیاند: "دوێنێ پێنجشەممە 12/12/2019 تیمەكانی بەڕێوەبەرایەتیی گشتیی كاروباری مین لە گەرمیان، ژمارەیەكی زۆر پارچە تەقمەنیی جۆراوجۆریان لەناو بردووە".
گوتیشی: "تەقەمەنییەكان بریتی بوون لە 108 پارچە تەقەمەنی و لە ناوچە جیاوازەكانی سنووری ئیدارەی گەرمیان لەلایەن تیمەكانی بەڕێوەبەرایەتیمانەوە دۆزراونەتەوە".
ئاماژەی بەوەش دا: "مێژووی تەقەمەنییەكان بۆ سەردەمی حكوومەتی بەعس دەگەڕنەوە و لە ماوەی سێ هەفتەی ڕابردووشدا ئەمە سێیەمین كاری تەقاندنەوەی تەقەمەنییە لەلایەن تیمەكانمانەوە لە سنووری گەرمیان ئەنجام دەدرێت".