هەولێر-KDP.info- سه‌رۆكى هه‌رێمى كوردستان نێچیرڤان بارزانى پیرۆزباییى ده‌ستبه‌كاربوونى له باڵیۆزى تازه‌ى به‌ریتانیا له عێراق كرد و هیواى سه‌ركه‌وتنى بۆ خواست، هه‌روه‌ها ویستى هه‌رێمى كوردستانى بۆ په‌ره‌پێدانى زیاترى په‌یوه‌ندییه‌كانى له‌گه‌ڵ به‌ریتانیا دووپات كرده‌وه.
ئێواره‌ى ئه‌مڕۆ دووشه‌ممه 16/12/2019 له هه‌ولێر به‌ڕێز نێچیرڤان بارزانى، سه‌رۆكى هه‌رێمى كوردستان له‌گه‌ڵ به‌ڕێز ستیفن هیكى، باڵیۆزى تازه‌ى به‌ریتانیا له عێراق دوایین پێشهاته‌كانى دۆخى عێراق و خۆپیشاندانه‌كان و پێشبینیى ئاینده‌ى پرۆسه‌ى سیاسییان له وڵات تاوتوێ كرد.
په‌یوه‌ندییه‌كانى عێراق و هه‌رێمى كوردستان له‌گه‌ڵ شانشینى یه‌كگرتوو، مه‌ترسیى سه‌رهه‌ڵدانه‌وه‌ى تیرۆر و جموجووڵه‌كانى ئه‌م دواییه‌ى داعش له چه‌ند ناوچه‌یه‌كى عێراق و پێویستیى به‌رده‌وامیى هاریكارى و هه‌ماهه‌نگیى نێوده‌وڵه‌تى بۆ چۆنیه‌تیى ڕووبه‌ڕووبوونه‌وه‌ى، دۆخى سووریا و ناوچه‌كه به‌گشتى، چه‌ند ته‌وه‌رێكى دیكه‌ى كۆبوونه‌وه‌كه بوون.