سكرتێری گشتیی ئه‌نجومه‌نی باڵای ئاسایشی نه‌ته‌وه‌یی ئێران، رایگه‌یاند "جگه له دانوستانه‌كانی ڤییه‌نا كه له باره‌ی به‌رنامه ئه‌تۆمییه‌كه‌ی ئێرانه، هیچ دانوستانێكی دیكه‌مان له‌گه‌ڵ ئه‌مریكا و ئه‌ورووپا نییه".
عه‌لی شه‌مخانی له هه‌ژماری تایبه‌تی خۆی له تویته‌ر له‌باره‌ی دانوستانه‌كانی ڤییه‌نا نووسیویه‌تی "ئه‌مریكا و ئه‌ورووپا له تاقیكردنه‌وه‌ی جێبه‌جێكردنی ئه‌ركه‌كانی تایبه‌ت به رێككه‌وتنه ئه‌تۆمییه‌كه شكستیان هێناوه".
سكرتێری گشتیی ئه‌نجوومه‌نی باڵای ئاسایشی نه‌ته‌وه‌یی ئێران رایگه‌یاندوه "رێككه‌وتنه ئه‌تۆمییه‌كه، له بواری ئابووریی و هه‌ڵگرتنی سزاكان، تا ئێستا وه‌ك قاوغێكی ناوبۆش وایه بۆ ئێران.
جگه له دانوستانه‌كانی تایبه‌ت به به‌رنامه ئه‌تۆمییه‌كه‌ش ئێمه هیچ دانوستانێكی دیكه‌مان له‌گه‌ڵ ئه‌مریكای پێشێلكه‌ری رێككه‌وتنه‌كه و ئه‌ورووپا نییه كه به‌رپرسیارییه‌تییه‌كانی تایبه‌ت به رێككه‌وتنه‌كه‌ی به‌جێنه‌هێناوه".
دانوستانه‌كانی ڤییه‌نا له باره‌ی به‌رنامه ئه‌تۆمییه‌كه‌ی ئێرانه‌وه به به‌شداری نوێنه‌رانی باڵای رووسیا، چین، ئه‌ڵمانیا، فه‌ڕه‌نسا، به‌ڕیتانیا و ئێران به‌رده‌وامه.