دیجیتال میدیای سپێده
ھێزەکانی سوپای عێراق و حەشدی شەعبی ئۆپەراسیۆنێکیان بە ئامانجی راوەدوونانی پاشماوەکانی رێکخراوی چه‌كداری داعش لە پارێزگای سەڵاحەددین باکووری ئەو وڵاتە، دەست پێ کرد.
ئەفسەرێک لە فەرماندەیی ئۆپەراسیۆنەکانی سەڵاحەددین پلەی موقەدەم کە نەیویست ناوی ئاشکرا بکرێت بە ئاژانسی ئانادۆڵی رایگەیاند کە ھێزەکانی سوپا و حەشدی شەعبی ئۆپەراسیۆنێکی ھاوبەشیان لە زنجیرە چیاکانی مەکحول باکووری پارێزگای سەڵاحەددین دەست پێ کردووە.
ئەفسەرەکە ئاماژەی بەوەیش دا کە ئامانج لە ئەنجامدانی ئۆپەراسیۆنەکە، راوەدوونانی چه‌كدارانی داعشە لە ناوچەکە.
زنجیرە چیاکانی مەکحول باکووری پارێزگای سەڵاحەددین، یەکێکە لەو ناوچانەی کە چه‌كدارانی داعش خۆیان تیایدا حەشار دەدەن.
سەرەڕای ئەوەی ھێزە عێراقییەکان داعشیان لە ناوچەکان شکست پێ ھێناوە، بەڵام شانە نووستووەکانی رێکخراوەکە تا ئێستا بەردەوامن لەسەر پەلامارەکانیان بەتایبەت لە ژمارەیەک ناوچەی سەربە پارێزگاکانی نەینەوا، کەرکووک، دیالە، سەڵاحەددین و ئەنبار.