دیجیتال میدیای سپێده
رێكخراوی نه‌ته‌وه‌یه‌كگرتووه‌كان ئاشكرایكرد بڕی ئه‌و هاوكارییه داراییه‌ی كه بۆ سووریا ئه‌مساڵ پێویسته بریتییه له 10 ملیار و 500 ملیۆن دۆلار.
گوته‌بێژی سكرتێری گشتیی نه‌ته‌وه‌یه‌كگرتووه‌كان، فه‌رحان حه‌ق، له‌میانی كۆنگره‌یه‌كی رۆژنامه‌وانییدا، ئاشكرایكرد، به‌ر له كۆبوونه‌وه‌ی پشتیوانیی له سووریا كه بڕیار له لایه‌ن یه‌كێتیی ئه‌ورووپا و نه‌ته‌وه‌یه‌كگرتووه‌كانه‌وه له ١٠ی ئایاردا له برۆكسل به‌ڕێوه‌بچێت، ئه‌مساڵ بانگه‌وازی كۆكردنه‌وه‌ی ١٠،٥ ملیار دۆلار ده‌كرێت.
فه‌رحان حه‌ق باسی له‌وه كرد به‌هۆی شه‌ڕی به‌رده‌وامی سووریاوه ٢٦،٥ ملیۆن كه‌س پێویستییان به هاوكاریی مرۆیی هه‌یه، له ناو وڵاته‌كه ١٤،٦ ملیۆن و كه‌س و له ده‌ره‌وه‌ی سووریاش ١٢ ملیۆن كه‌س كه زیاتر له پێنج ملیۆنیان په‌نابه‌رن، پێویستییان به یارمه‌تییه.
حه‌ق جه‌ختی له‌وه‌ش كرده‌وه بۆ ساڵی ٢٠٢٢ پێویستیی سووریا بریتییه له ١٠،٥ ملیار دۆلار كه ٤،٤ ملیاری بۆ ناوخۆی وڵاته‌كه و ٦،١ ملیاری بۆ په‌نابه‌ره سوورییه‌كان و ئه‌و وڵاتانه‌ی میواندارییان ده‌كه‌ن وه‌ك پشتیوانیی به‌كارده‌هێنرێت.