هەولێر-KDP.info- لەبارەی لێدوانێکی پێشووتری بۆ ماڵپەڕی فەرمیی پارتی دیموکراتی کوردستان، تاڤگە عومەر، بەڕێوەبەری گشتیی یاسای دەستەی مافی مرۆڤ سەبارەت بە مۆڵەتی چەکهەڵگرتن و ژمارەی مۆڵەتەکان ڕوونکردنەوەیەک ڕادەگەینێت، کە ئەمە دەقەکەیەتی:
سەبارەت بە لێدوانمان دەربارەی ھەڵوەشاندنەوەی مۆڵەتی چەکھەڵگرتن لە ھەرێمی کوردستان بۆ ماڵپەڕی فەرمیی پارتی دیموکراتی کوردستان، دیارە ئێستا وەزارەتی ناوخۆی حکوومەتی ھەرێمی کوردستان سەبارەت بەم پرسە ڕێکاری توندوتۆڵی وەرگرتووە و کاری جیددی دەکەن بۆ ڕێکخستنی دیاردەی چەکھەڵگرتن لە ھەرێمی کوردستان و ھەرکەسێک مۆڵەتی ھەڵگرتنی چەکی نەبێت بەپێی ڕێنماییی وەزارەت، ڕووبەڕووی یاسا دەبێتەوە، بۆیە وەزارەت مۆڵەتەکان ھەڵناوەشێنێتەوە، بەڵکو ڕێکخستنەوەیان بۆ دەکات، ھەروەھا سەبارەت بەو ژمارەیەی ھاتووە، کە یەک ملیۆن چەک مۆڵەتی پێ دراوە، دوای تەئکیدکردنەوەم دەرکەوت کە، وەزارەت نزیکەی پانزە (١٥٠٠٠)ھەزار مۆڵەتی داوە، لەو ژمارە نافەرمیەی کە تۆمار کراوە و، ئەوەی ئاماژەی پێ کراوە ژمارەی سەرجەم چەکەکانە لە ھەرێمی کوردستان بەمۆڵەت و بێمۆڵەت.