دهۆك-KDP.info- به مه‌به‌ستی خزمه‌تكردنی هاووڵاتییانی دهۆك و ڕووبه‌ڕووبوونه‌وه‌ی ڤایرۆسی كۆرۆنا، كۆمپانیای كاڤین گرووپ نه‌خۆشخانه‌یه‌كی تایبه‌ت به كۆرۆنا له سه‌نته‌ری پارێزگاكه دروست ده‌كات.
پارێزه‌ر شادان جه‌میل، نوێنه‌ری كومپانیی كاڤین گرووپ له لێدوانێكدا به ماڵپه‌ڕى فه‌رمیى پارتى دیموكراتى كوردستانى ڕاگه‌یاند، "به مه‌به‌ستی هاوكاریكردنی ژووری نه‌شته‌رگه‌ریی ئۆپراسیۆنی ڕووبه‌ڕووبوونه‌وه‌ی ڤایرۆسی كۆرۆنا له هه‌رێمی كوردستان و پارێزگای دهۆك، نه‌خۆشخانه‌یه‌كی تایبه‌ت بۆ ئه‌م مه‌به‌سته دروست ده‌كه‌ین.
شادان جه‌میل گوتیشی، "نه‌خۆشخانه‌كه به‌پێی خواستی به‌ڕێوه‌به‌رایه‌تی گشتی ته‌ندروستیی دهۆك به ژماره و پێویستی پارێزگای دهۆك كه چه‌ند قه‌ره‌وێڵه‌ی پێویسته ئه‌وه‌نده دروست ده‌كه‌ین، به‌ڵام له 50 قه‌ره‌وێڵه كه‌متر نابێت، بێجگه له دروستكردنی نه‌خۆشخانه هاوكات هه‌موو پێداویستییه‌كی پزیشكیی تایبه‌ت به كۆرۆنای تێدا دابین ده‌كرێت.
به‌پێی قسه‌ی ئه‌و به‌رپرسه‌ی كومپانیای كاڤین گرووپ، نه‌خۆشخانه‌كه له نێوان حه‌وت بۆ 10 رۆژ ته‌واو ده‌كرێت و ده‌كه‌وێته خزمه‌ت به به‌ڕێوه‌به‌رایه‌تی گشتی ته‌ندروستی دهۆك، ئه‌وان ده‌توانن بۆ چاره‌سه‌ركردنی كۆرۆنا به‌پێی پێویست به‌كاری بێنن.
ئه‌مه‌ش ده‌بێته دووه‌م نه‌خۆشخانه‌ی تایبه‌ت له سنووری پارێزگای دهۆك كه ئێسته دروست ده‌كرێت، یه‌كێكیان له‌لایه‌ن كۆمپانیای كاڤین گرووپ و له سه‌نته‌ری شاری دهۆك دروست ده‌كرێت، یه‌كی تریش له شاره‌دێی فه‌یدیێ له‌لایه‌ن هه‌ندێ خێرخوازی تر دروست ده‌كرێت.
نەشوان بەرزنجی