دیجیتاڵ میدیای سپێده
چوارچێوەی ھەماھەنگی رایگەیاند کە بەردەوامن لە ھەنگاوەکانیان بۆ ئەوەی حکوومەتی نوێی عێراق بەسەرۆکایەتی محەمەد شیاع سوودانی پێکبھێنن.
میدیا عێراقییەکان لەنێویاندا کەناڵی رافیدەین بڵاویان کردەوە کە چوارچێوەی ھەماھەنگیی لە راگەیەندراوێکدا جەختی کردووەتەوە لەسەر ئەوەی کە بەردەوامە لە ھەنگاوەکانی، بۆ ئەوەی حکوومەتی نوێی عێراق بەسەرۆکایەتی محەمەد شیاع سوودانی پێکبھێنن.
هەروەها ئەمڕۆ پێنجشەممە ٢٨ی تەمووزی ٢٠٢٢ محەمەد شیاع سوودانی رایگەیاند کە پابەند دەبێت بە بڕیارەکەی چوارچێوەی ھەماھەنگیی لەبارەی کاندیدکردنی بۆ پۆستی سەرۆکوەزیرانی نوێی عێراق.
دوێنێ چوارشەممە ٢٧ی تەمووزی ٢٠٢٢، لایەنگرانی رەوتی سەدر دژبە کاندیدکردنی محەمەد شیاع سوودانی بۆ پۆستی سەرۆکوەزیرانی عێراق لەلایەن چوارچێوەی ھەماھەنگییەوە لە گۆڕەپانی تەحریر ناوەڕاستی بەغدا گردبوونەوە و دواتر ھەڵیانکوتایە سەر باڵەخانەی ئەنجوومەنی نوێنەران کە دەکەوێتە ناوچەی سەوز.
رۆژی دووشەممە ٢٥ی تەمووزی ٢٠٢٢، ھاوپەیمانی چوارچێوەی ھەماھەنگی رایگەیاندبوو کە محەمەد شیاع سوودانی بۆ پۆستی سەرۆکوەزیرانی نوێی عێراق کاندیدکردووە.