دیجیتاڵ میدیای سپێده
بە ئامادەبوونی کۆنسولی گشتیی کۆماری چیک، کارێل کۆرتانێک، بەڕێوەبەری جێبەجێکاری کۆمپانیای فلای ئەربیل و ئور ئەیرلاین، لاوەند شێخ مەموەندی دەستپێکردنی یەکەمین گەشتی ئاسمانیی راستەوخۆی نێوان ھەولێر و پراگ راگەیەندرا.
لە کۆنگرەیەکی رۆژنامەوانیدا، لاوەند شێخ مەموەندی ئاماژەی بەوە دا کە کۆمپانیای فلای ئەربیل بە ھاوکاری لەگەڵ کۆمپانیای ئور ئەیرلاین، گەشتەکانی فراوانتر کردووە و توانیوێتی ھەولێری پایتەخت زیاتر بە جیھان ببەستێتەوە و گوتی: "ئەمڕۆ دەستپێکردنی یەکەمین گەشتی ئاسمانیی راستەخۆ لەنێوان ھەولێر و پراگ رادەگەیەنیین کە بڕیارە لە ١٠ی تشرینی یەکەمی ٢٠٢٢، ئەنجام بدرێت".
لاوەند شێخ مەموەندی ئەوەیشی خستەڕوو کە لەگەڵ دەستپێکردنی گەشتی ئاسمانیی نێوان ھەولێر و پراگ، ئاسانکاریی وەرگرتنی ڤیزای کۆماری چیک بۆ گەشتیاران و ھاووڵاتییانی ھەرێمی کوردستان دەکرێت.
گوتیشی: "ئەمە ١٤یەمین ھێڵی ئاسمانییە کە لەلایەن کۆمپانیای کۆمپانیای فلای ئەربیل و ئور ئەیرلاین-ەوە لە ھەولێر دەکرێتەوە".
لای خۆیەوە کۆنسولی گشتیی کۆماری چیک، کارێل کۆرتانێک خۆشحاڵی خۆی نیشان دا سەبارەت بە دەستپێکردنی گەشتە ئاسمانییەکانی نێوان پراگ و ھەولێر کە لەلایەن کۆمپانیای فلای ئەربیل-ەوە ئەنجام دەدرێت.
راشیگەیاند "دەستپێکردنی گەشتە ئاسمانییەکانی نێوان پراگ-ھەولێر، دەبێتە مایەی پتەوترکردنی پەیوەندییەکانی نێوان کۆماری چیک و ھەرێمی کوردستان، ھەروەھا ئەمە دەرفەتێکی زێڕینە بۆ ئەوەی کەرتی گەشتوگوزار لەنێوان ھەردوولادا، زیاتر پێش بخەین".