هەولێر-KDP.info- ستیڤن فیگن، کونسووڵی گشتیی ویلایەتە یەکگرتووەکانی ئەمەریکا لە هەرێمی کوردستان و مارک پادجێت، بەرپرسی دۆسیەی کاروباری سیاسیی کونسووڵخانەی ئەمەریکا، سەردانی مەکتەبی پەیوەندییەکانی دەرەوەی (پ.د.ک)ی کرد و لە لایەن هۆشیار سیوەیلی، بەرپرسی مەکتەب و ژمارەیەک لە هەڤاڵانی پەیوەندییەکانی دەرەوەی (پ.د.ک) بەگەرمی پێشوازی کران.
هۆشیار سیوەیلی، وێڕای بەخێرهاتنی کونسووڵی گشتیی ئەمەریکا و شاندی یاوەری سوپاس و پێزانینی سەرکردایەتیی پارتی دیمۆکراتی کوردستانی سەبارەت بە گرنگیدانی ویلاتە یەکگرتووەکانی ئەمەریکا بە پێگەی هەرێمی کوردستان و بەرەوپێشبردنی ئاستی پەیوەندییە سیاسی و دیپلۆماسییەکان و هاوکارییە سەربازی و مرۆیی و ئابوورییەکانی ویلایەتە یەکگرتووەکانی ئەمەریکای لەگەڵ هەرێمی کوردستاندا گەیاندە کونسووڵی گشتیی ئەمەریکا، هەروەها سەردانە فەرمییەکانی ئەم دواییەی شاندە باڵاکانی ویلایەتە یەکگرتووەکانی ئەمەریکا بۆ هەرێمی کوردستان بە سەرۆکایەتیی بەڕێزان، مایک پێنس، جێگری سەرۆکی ئەمەریکا و جەیمس جێفری، نێردەی سەرۆکی ئەمەریکا بۆ جەنگی دژ بە داعش و دیدار و کۆبوونەوەکانیان لەگەڵ سەرکردایەتیی سیاسیی کوردستان و پابەندبوونی ویلایەتە یەکگرتووەکانی ئەمەریکا بە دۆستایەتی و هاوکاریکردن و پشتگیریکردنی وڵاتەکەیان لە ئەزموونی سیاسی و دیمۆکراتی و سەقامگیریی هەرێمی کوردستاندا بەرز نرخاند.
لە تەوەرێکی تری دیدارەکەدا، بەرپرسی پەیوەندییەکانی دەرەوە، دیدگای پارتی دیمۆکراتی کوردستانی لەسەر دۆخی ئێستای ناوخۆی عێراق و کوردستانی بۆ شاندی مێوان خستە ڕوو و تێڕوانینی پارتیی بو پێشهاتە سیاسییەکانی عێراق گەیاندە کونسووڵی گشتیی ویلایەتە یەکگرتووەکانی ئەمەریکا و ڕایگەیاند، لە دیدی (پ.د.ک)ـەوە خواستەکانی دەنگدەرانی عێراق و خۆپێشاندانە جەماوەرییەکان بۆ چاکسازی و نەهێشتنی گەندەڵی، بە ئاراستەی داواکردنی خزمەتگوزاریی گشتی و مافە سەرەتاییەکانی خەڵک لە چوارچیوەی دەستووردا و گۆڕانکاری لە پرۆسەی سیاسی و بەرەوپیشبردنی دیالۆگی نێوان لایەنە سیاسییەکان و پێکهاتەکانی عێراق بۆ دەستنیشانکردنی سەرۆکوەزیرانێکی تازە، داواکاریی ڕەوان و، پارتی دیمۆکراتی کوردستان هێڵی سووری لەسەر هێچ کاندیدێک بۆ وەرگرتنی پۆستی سەرۆکوەزیران دانەناوە و، هەرێمی کوردستان خوازیارە برەو بە پەیوەندییەکانی خۆی و ئەو ڕێککەوتنانەی بدا، کە لەگەڵ بەغدا لەسەر بنەمای بەرژەوەندیی هاوبەش بۆ بەرەوپێشبردنی پەیوەندیی ئیتحادیی نێوان هەرێمی کوردستان و بەغدا لەسەری ڕێک کەوتوون، کە بۆ هێنانەدی مافە دەستوورییەکانی خەڵکی هەرێمی کوردستان لە چوارچیوەی یاسای بنەڕەتیی عێراقی فیدراڵدا هەموو هەوڵێک دەخاتە گەڕ. هەرێمی کوردستان و سەرکردایەتیی سیاسیی پارتی دیمۆکراتی کوردستان لە نزیکەوە چاودێریی دۆخی سیاسیی عێراق دەکەن و خوازیارن سەرۆکوەزیرانی تازە پارێزەری دەستوور و ئازادییە تاکەکەسیەکان و مافەکانی دەنگدەران بێت و ڕێز لە یەکسانی و دادپەروەریی کۆمەڵایەتی و پرەنسیپەکانی دیموکراسی بگرێت و بتوانێ جێی ڕەزامەندی جەماوەر و لایەنە سیاسییەکان و پێکهاتە ئیتنی و نەتەوەییەکانی عێراق بێت و ئاشتی و ئارامی و سەقامگێڕی بگەڕێنێتەوە بۆ وڵات و چاکسازی و خزمەتگوزاریی پێویست بۆ وڵات دابین بکات و گەندەڵی و تیرۆر و توندوتیژی و دەستێوەردانی دەرەکی بنبڕ بکات و ئاشتیی کۆمەڵاتی لە نێوان هەموو پێکهاتەکانی وڵاتدا بەرقەرار بکات، کە بە هۆیەوە مەترسییەکی گەورە لەبەردەم بەرەوپێشچوونی پرۆسەی سیاسی و حوکمڕانیی عێراقدا پەیدا بووە و کاریگەریی لەسەر هەرێمی کوردستان و ناوچەکەش هەیە.
لە تەوەرێکی تری دیدارەکەدا، بەرپرسی پەیوەندییەکانی دەرەوەی (پ.د.ک) شیکردنەوە و هەڵسەنگاندنی هەبوو بۆ پێشکەوتنەکانی حکوومەتی هەرێمی کوردستان لەسەر جێبەجێکردنی نەخشە ڕێ و پلانی ستراتیژیی حکوومەت و بەهێزکردنی جومگەکانی حوکمڕانی و هێنانەدیی ئاشتی و سەقامگیری و بەرقەرارکردنی ئاسایش و بنبڕکردنی گەندەڵی، بۆ خۆشگوزەرانیی هاووڵاتیان و هەوڵەکانی حکوومەتی هەرێم لە پیادەکردنی سیاسەتی ڕیفۆرم و چاکسازی، هەروەک لە ڕاپۆرتی (١٠٠) ڕۆژی ڕابردووی کابینەی نۆیەمی حکوومەتی هەرێمدا ئاماژەی پێ کراوە.
لە تەوەرێکی تری کۆبۆنەوەکەدا، لەسەر پێشهاتەکانی ناوچەکە و پەیوەندییەکان لە گەڵ وڵاتانی دراوسێ و دواگۆڕەنکارییەکان سەبارەت بە دۆخی ڕۆژئاوای کوردستان و نیگەرانییەکانی پارتی دیمۆکراتی کوردستان، سەبارەت بە بەردەوامیی شەڕ و توندوتیژییەکان خستە ڕوو و ڕایگەیاند، کە (پ.د.ک) هەر لە سەرەتای گرژی و سەرهەڵدانی شەڕ و ناکۆکییەکانی نێوان تورکیا و ڕۆژئاوای کوردستان داوای کردووە لە ڕیگەی دیالۆگی سیاسی و بە مێتۆدی ئاشتیانە کێشە و ناکۆکییەکانی نیوانیان چارەسەر بکەن و ڕێگە لە سەرهەڵدانەوەی قەیران و کارەساتێکی مرۆیی لە ناوچەکەدا بگرن و ئاشتی و ئارامی و سەقامگیریی ناوچەکە و یەکلاییکردنەوەی کێشەکانیان بە ڕیگەی سەربازی نەخرێتە بەردەم مەترسییەوە، کە کاریگەرییەکی خراپێ دەبێت بۆ سەر هەموو ناوچەکە و لەسەر ئاستی نیودەوڵەتیشدا لە ڕووی سیاسی و دیپلۆماسی و ئەمنی و چەندین بواری ترەوە ناکۆکییەکان فراونتر دەکەن و پەیوەندیی دۆستانەی نێوان هەموو ئایین و نەتەوەکانی ناوچەکەش دەخاتە بەردەم مەترسییەوە و بەردەوامیی شەڕ و توندوتیژی لە ناوچەکەدا، توندوتیژی و سەرهەڵدانەوەی تیرۆری لێ دەکەوێتەوە، کە زیانی بۆ ئاشتی و سەقامگیری و ئاسایشی هەموو ناوچەکە دەبێت و لە لایەکی تریشەوە، (پ.د.ک ) هەوڵی زۆری داوە بۆ نزیکبوونەوەی ئەنەکەسە و لایەنە ناکۆکەکانی تر لە ڕۆژئاوای کوردستان بە ئاراستەی هاوکاری و دیالۆگی سیاسی و نزیکردنەوەی تێڕوانینی لایەنە ناکۆکەکان بۆ هێورکردنەوەی دۆخی ڕۆژئاوا و دۆزینەوەی چارەسەرییەکی سیاسیی گونجاو سەبارەت بە ئێستا و ئایندەی ڕۆژئاوای کوردستان، کە هەموو لایەنەکان پێی ڕازی بن.rستیڤن فیگن، کونسووڵی گشتیی ویلایەتە یەکگرتووەکانی ئەمەریکا لە هەرێمی کوردستان، خۆشحاڵیی خۆی بەم دیدارە و ئاڵۆگۆڕی دیدگای هەردوو لا لەسەر پێشهاتەکانی ناوچەکە و دۆخی ناوخۆیی و پرۆسەی سیاسی لە عێراق و پێشکەوتنەکانی هەرێمی کوردستان و بەرەوپێشچوونی پەیوەندییەکانی نێوان هەرێمی کوردستان و ولایەتە یەکگرتووەکانی ئەمەریکای لە هەموو بوارەکانی جێی بایەخی نێوان هەردوو لا دەربڕی، کە دیدگای هاوبەشن و خزمەت بە ئاشتی و ئارامی و سەقامگیریی ناوچەکە دەکات. لە لایەکی تریشەوە سەردانە فەرمییەکانی ئەم دواییەی شاندە باڵاکانی ویلایەتە یەکگرتووەکانی ئەمەریکای بۆ هەولێری پایتەخت کە هاوکاری و هەماهەنگیی نێوان هەرێمی کوردستان و ویلاتە یەکرتووەکانی ئەمەریکا لەسەر ئاستی ناوخۆییی عێراق و هەرێمی کوردستان و لە هەموو ناوچەکەشدا پتەوتر دەکات، خستە ڕوو و، پەیوەندییەکانی ستراتیژی نێوان هەردوو لا دەباتە ئاستێکی پێشکەوتووتر و بەتایبەتی لە بەردەوامیدان لە شەڕی بنبڕکردنی تیرۆر لە ناوچەکەدا کە بەردەوام هەڕەشەیە بۆ سەر ئاشتی و مرۆڤایەتی. ویلایەتە یەکگرتووەکانی ئەمەریکا و هەرێمی کوردستان لەسەر پرسە چارەنووسسازەکان دیدگای هاوبەشیان هەیە بۆ ئێستا و ئایندەی پرۆسەی سیاسی لە عێراق و ناوچەکەدا، هەر بۆیە هاوکاری و پشتگیری و هەماهەنگیی وڵاتەکەی لەگەڵ هەرێمی کوردستاندا بەردەوام دەبێت.