دیجیتال میدیای سپێده
وڵاتانی یه‌كێتی ئه‌وروپا، پێشێلكردنی ئه‌و سزایانه‌ی كه‌له‌سه‌ر روسیا جێبه‌جێ كراوه خسته سه‌ر لیستی تاوانه‌كانی یه‌كێتی ئه‌وروپا.
كۆنسه‌ی یه‌كێتی ئه‌وروپا رایگه‌یاند: وڵاتانی ئه‌ندامی یه‌كێتییه‌كه به‌كۆی ده‌نگ بڕیاریاندا پێشێلكردنی سزا سنوورداركردنه‌كانی دژی روسیا بۆ لیستی تاوانه‌كانی یه‌كێتی ئه‌وروپا له‌په‌یماننامه‌ی یه‌كێتی ئه‌وروپا زیاد بكرێت.
كۆنسه‌ی یه‌كێتی ئه‌وروپا راشیگه‌یاند: له‌ئێستادا یه‌كێتی ئه‌وروپا به‌هۆی شه‌ڕی ئۆكرایناوه زنجیره‌یه‌ك رێوشوێنی سنوورداركردنی دژبه روسیا گرتووه‌ته‌به‌رو جێبه‌جێكردنی ته‌واوی ئه‌و رێوشوێنانه زۆر گرنگه.
ئاماژه‌ى به‌وه‌شكردوه: له‌ئێستادا وڵاتانی ئه‌ندام پێناسه‌ی جیاوازیان بۆ ئه‌وه هه‌یه كه‌پێشێلكردنی رێوشوێنه سنوورداره‌كان چییه‌و له‌ئه‌گه‌ری سه‌رپێچیكردندا ده‌بێت چی سزایه‌ك جێبه‌جێ بكرێت،ئاماژه به‌وه كراوه: ئه‌مه ده‌بێته هۆی جێبه‌جێكردنی سزاكان به‌پله‌ی جیاواز ومه‌ترسی ده‌ربازبوون له‌م سزایانه.
ئه‌وه‌ش خراوه‌ته‌ڕوو: داخڵكردنی پێشێلكردنی رێوشوێنه سنوورداره‌كان بۆ لیستی تاوانه‌كانی یه‌كێتی ئه‌وروپا، دڵنیایی له‌وه ده‌دات كه‌سزاكان له‌سه‌رانسه‌ری یه‌كێتی ئه‌وروپا له‌ئاستێكی هاوشێوه‌دا جێبه‌جێ ده‌كرێت وبه‌رپه‌رچی هه‌موو هه‌وڵدانێك بۆ پێشێلكردنی سزاكان ده‌درێته‌وه.