دیجیتال میدیای سپێده
وه‌زاره‌تى ده‌ره‌وه‌ى روسیا ره‌خنه له‌یه‌كێتى ئه‌وروپا ده‌گرێت كه‌داواى كردوه پێویسته توركیاش به‌شدارى له‌و سزایانه دا بكات كه‌یه‌كێتى ئه‌وروپا به‌سه‌ر روسیا دا سه‌پاندوویه‌تى ورایگه‌یاندوه: نوێنه‌رى یه‌كێتى ئه‌وروپا هیچ بیركردنه‌وه‌یه‌كى لۆژیكى نیه.
ماریا زاخارۆڤا، گوته‌بێژى وه‌زاره‌تى ده‌ره‌وه‌ى روسیا رایگه‌یاند: لێدوانه‌كانی جۆزێپ بۆرێل نوێنه‌رى یه‌كێتى ئه‌وروپا، هیچ بیركردنه‌وه‌یه‌كی لۆژیكی تێدا نییه، و یه‌كێتی ئه‌وروپا گوشار له‌توركیا ده‌كات بۆ ئه‌وه‌ی به‌شداری له‌سزاكانی سه‌ر روسیا بكات. وگوتى: توركیا به‌هۆی په‌یوه‌ندی له‌گه‌ڵ حكوومه‌تی مۆسكۆ كراوه‌ته ئامانج.
گوته‌بێژی وه‌زاره‌تی ده‌ره‌وه‌ی روسیا، ره‌خنه‌ی له‌بۆرێل گرت به‌هۆی لاوازی هه‌ڵوێسته‌كه‌ی وبڵاوكردنه‌وه‌ی قسه‌ی بێ مانای درۆ، وگوتی: ئه‌م بیركردنه‌وه‌یه ره‌گ و ریشه‌ی قووڵی له‌داگیركاری وفاشیزمدا هه‌یه.
ئاماژه‌ى به‌وه‌شكرد: بۆرێل وبه‌رپرسانی دیكه‌ی خۆرئاوا، به‌رژه‌وه‌ندییه نیشتمانییه‌كانی توركیا و وڵاتانی دیكه له‌به‌رچاو ناگرن و، گوتی: ده‌كرێت ئه‌نقه‌ره ئه‌گه‌ر خزمه‌ت به به‌رژه‌وه‌ندییه‌كانی خۆرئاوا بكات ببێته ئه‌ندامی ناتۆ، به‌ڵام نابێته به‌شێك له‌یه‌كێتی ئه‌وروپا وبێبه‌شیش كراوه له‌ناوچه‌ی شنگن.