سەرۆکوەزیرانی عێراق، محەمەد شیاع سوودانی و سەرۆکی ئەنجوومەنی باڵای دادوەریی، فایەق زێدان فۆرمی دەستەی دەستپاکی تایبەت بە ئاشکراکردنی سەروەتی خۆیان بۆ ساڵی ٢٠٢٣ پڕ کردەوە.
لەمبارەیەوە دەستەی دەستپاکی لە عێراق لە راگەیەنراوێکدا ئاماژەی بەوەداوە کە محەمەد شیاع سوودانی و فایەق زێدان بە جیا لە دوو فۆرمدا کە ئاراستەی دەستەی دەستپاکیان کردووە، سەروەتی دارایی خۆیان بۆ ساڵی ٢٠٢٣ ئاشکرا کردووە.
ئەوەیشی وەبیرھێناوەتەوە کە لە ماددەی ١٦ی یاسای دەستەی دەستپاکی ژمارە ٣٠ی بۆ ساڵی ٢٠١١ی ھەموارکراودا ئاماژە بەوەکراوە، ھەر سێی سەرۆکایەتییەکەی عێراق، ھەروەھا وەزیرەکان و ھەموو ئەو کەسانەی کە پۆستە فەرمییەکان بەڕێوەدەبن، پێویستە فۆرمی ئاشکراکردنی سەروەتی خۆیان پڕ بکەنەوە.
بەوەیش محەمەد شیاع سوودانی و فایەق زێدان بوون بە یەکەم و دووەم گەورە بەرپرسی عێراق کە فۆرمی سەروەتی خۆیان بۆ ساڵی ٢٠٢٣ ئاشکرا کردووە.