تەقینەوەیەكی بەهێز لەبەردەم وەزارەتی دەرەوەی ئەفغانستان لەكابوڵ روویدا، بەوهۆیەوە زیاتر لە 20 كەس گیانیان لەدەستدا.
گوتەبێژی بەڕێوەبەرایەتی ئاسایشی ئیدارەی تاڵیبان لە كابوڵ خالید زاردان ئاشكرایكرد، تەقینەوەیەك لە نزیك وەزارەتی دەرەوە روویداوە.
خالید زاردان، ئاماژەی بەوە كرد كە زیاتر لە 20 كەس بەهۆی تەقینەوەكەوە گیانیان لەدەستداوەو،ژمارەیەكی زۆریش برینداربوون و ئاشكرایكرد،ئەنجامدەرانی تەقینەوەكە دەستگیردەكەن و بە سزایان دەگەیەنن.
هاوكات هێزەكانی تاڵیبان سەرجەم ئەو شەقام و كۆڵانانەیان داخست كەبە ئاڕاستەی وەزارەتی دەرەوە دەچن ،رێوشوێنی ئەمنی توندیان لەناوچەكە گرتەبەر.
لەلایەكی دیكەوە،ئەوەش راگەیەندرا كەشەقامی نەخۆشخانەی فریاكەوتن لەناوەندی كابوڵ بەڕووی هاتوچۆدا داخراوەو بریندارەكانی بۆ گواستراوەتەوە.