دیجیتاڵ میدیای سپێده
لە ویلایەتی کنتاکی ئەمریکا و لە میانی مەشقی سەربازی ئاساییدا، دوو هێلکۆپتەری سەربازیی کەوتنەخوارەوە.
ئەو دوو هێلکۆپتەرە لە جۆری "HH-60 Blackhawk" و سەربە لیوای ١٠١ی هێزە ئاسمانییەکانی ناوچەی تریگ کاونتریی ویلایەتەکە بوون و کاتژمێر ٢٢:٠٠ی شەوی رابردوو کەوتوونەتەخوار.
لیوای ١٠١ لە هەژماری تایبەتی خۆی لە تۆڕی کۆمەڵایەتی تویتەر راگەیەندراوێکی بڵاوکردووەتەوە و تیایدا ئەوەی خستووەتەڕوو کە لە رووداوەکەدا حاڵەتی گیان لەدەستدان و بریندار بوون هەبوون، بەڵام هیچ وردەکارییەکی لەوبارەیەوە نەخستووەتەڕوو.
لە راگەیەندراوەکەدا هاتووە: "لەئێستادا گرنگی بەو سەربازانەی پەیوەندییان بە رووداوەکەوە هەبووە و خێزانەکانیان دەدەین".
لێکۆڵینەوەش لە رووداوەکە بەردەوامە.