دیجیتاڵ میدیای سپێده
وەزارەتی دەرەوەی عێراق رایگەیاند کە سبەی دووشەممە، وەزیری دەرەوەی ئۆکراینا، دمیترۆ کوڵیبا سەردانی بەغدا دەکات و لە میانیدا زنجیرەیەک دیدار و کۆبوونەوە لەگەڵ ژمارەیەک لە گەورە بەرپرسانی عێراق ئەنجام دەدات.
گوتەبێژی وەزارەتی دەرەوەی عێراق، ئەحمەد سەحاف لە لێدوانێکدا بۆ ئاژانسی ھەواڵیی فەرمی عێراق رایگەیاندووە کە سبەی دووشەممە، وەزیری دەرەوەی ئۆکراینا، دمیترۆ کوڵیبا سەردانی بەغدا دەکات.
ئاماژەی بەوەیشداوە کە دمیترۆ کوڵیبا لە میانی سەردانەکەی بۆ بەغدا، بە جیا لەگەڵ سەرۆکوەزیرانی عێراق، محەمەد شیاع سوودانی و وەزیری دەرەوەی عێراق، فوئاد حوسێن کۆدەبێتەوە.
ئەوەیشی خستووەتەڕوو کە لە میانی کۆبوونەوەکانی وەزیری دەرەوەی ئۆکراینا و بەرپرسانی عێراقدا، پتەوترکردنی پەیوەندییەکانی نێوان هەردوو وڵات، ھەروەھا پێشھاتە ھەرێمیی و نێودەوڵەتییەکان تاوتوێ دەکرێت.