لیژنەی دارایی لەپەرلەمانی عێراق پێشبینی دەكات دەنگدان وپەسەندكردنی پرۆژە یاسایی بودجەی گشتی بۆ ساڵی 2023 بكەوێتە هەفتەی داهاتوو دا.
موزڕ كورەوی، ئەندامی لیژنەی دارایی لەپەرلەمانی عێراق رایگەیاندوە: لیژنەی دارایی لەماوەی 24 كاتژمێر رۆژانە كار دەكات بۆ یەكلاكردنەوەی بەندەكانی پرۆژە یاسایی بودجە وبۆ ئەو مەبەستەش چەندین وەزارەتیان مێوانداریكردوە.
كورەوی راشیگەیاندوە: لەماوەی هەفتەی داهاتوو دا پرۆژە یاسایی بودجەی گشتی لەكۆبوونەوەیەكی تایبەتی پەرلەماندا دەخرێتە دەنگدان وپەسەند دەكرێت، وجەختیشی كردەوە: لەئێستا دا هەوڵەكان بۆ كەمكردنی كورتهێنانی بودجەیە ودابینكردنی پارەیە بۆ بەندی دیكەی گرنگ بۆ دابینكردنی پرۆژە وخزمەتگوزاری سەرەتایی.
ئاماژەی بەوەشكردوە: پرۆژە یاسایی بودجەی گشتی 2023، ئاڵنگاری زۆری تێدایە ولیژنەی دارایش هەوڵدەدات بۆ كەمكردنەوەیان وكەمكردنەوەی قەرزەكان.
لیژنەی دارایی وپەرلەمانی عێراق لەماوەی رابردوو دا هەوڵەكانیان خستووتە گەڕ بۆ یەكلاكردنەوەی پرۆژە یاسایی بودجە، جگە لەو ئاڵنگارییانەی لەدۆسیەی كورتهێنان و نرخەكانی نەوت دا هەیە.