پەمێ دز، دەس وە ڕیشیا کیشی!
لە بۊەشەیل شنەفتم، ڕاست و دروی وە مل خوەیان...
ئۊشن شار کرماشان دادوەری داشت کە مۊ لە ماسەو جیاوە کرد.
ڕۆژێگ، تاجرێگ هاتە خزمەتی و وەت: هاوار و هانا، دزد چەپاوم کردیە و لە ئەمارم مەنێگ پەمی ئڕام نەیشتنە!!!
دادوەر پرسیار کرد کە دڵت لە کی ها لە گومان؟
تاجر وەت: وە باتن، دڵم لە هیچکەس وە شکەو نیە...
دادوەر، لە هەر جرخە و کسبێگ، دەسە دەسە هاورد و وە هزار لەون، دپیەکیان کردەو.
تا ڕۆژێگ جەرخەی تجار هاوردنە خزمەتی ئڕا پرس و جو لە بارەی دزد و پەمی .
دادوەر وەت: ماڵ بریای بارن تا دز خوەی بناسی.
تاجر ماڵ بریای هاوردن و دادوەر ڕۊ کردەو پێ و وەت:
کور باتن! ت دز ماڵ خوەد چۊ نیەناسی؟
ماڵ بریای وەت: قوربان، وە چەو خوەم شک دێرم، وە جەرخەی تاجران شک نەیرم...
دادوەر وەت: ت هەم ماڵد بریاس و هەم چەودیش کورە!!!
ماڵ بریای وەت: ئڕا قوربان!؟
دادوەر وەت: ت نیەۊنی دز پەمیەگە، هێمان نەتۆەنستیە دەموچەوی لە کورک پەمی بسڕیدەو؟
لەو هەینە، یەکێگ لە تاجران، دەس برد ئڕا دەموچەوی...
دادوەر وەت: باڵوەسی کەن! دز هەر خوەیە...
لەو ڕۆژەو، ئێ واتە کەفتە دەم خەڵک....
فەرهاد عزەتی زادە