شەفەق نیوز/ ئمڕوو یەکشەممە، لە پارێزگای سلێمانی یەکەمین نوسینگەی راهێنان رانندەیی وازکریا و مووڵەت رانندەیی دریەدە خاوەن پێداویستی تایبەتەیل کولەباڵا، و داوای دابینکردن ماشینەیل تایبەت کەن ئەرایان.
عومەر جەبار وەرپرسس کۆمەڵەی کوڵە باڵایەیل سلێمانی لە کۆنگرەیگ رووژنامەوانی ک ئاژانس شەفەق نیوز ئامادەی بوی وت،" ئمڕوو یەکەمین نوسینگەی راهێنان رانندەیی و بەخشین مۆلەت رانندەیی وە کولەباڵایەیل لە سلێمانی وازکریا ک یەکەم جارە لە هەرێم کوردستان.
وتیش" نوسینگەگە ماشین تایبەت ئامادەکردیە ئەرا ئەو بارودۆخ تایبەتیانە تا راهێنەرەیل هوکارەی کوڵەباڵایەیل بکەن تا قۆناغەیل تاقیکردنەوە رەدبکەن و بتوەنن مووڵەت فەرمی وەربگرن لە وەریەوبەرایەتی هاتوچو پارێزگای سلێمانی".
دیاریکرد" ئی نوسینگەی وە تەقەڵای تاکەکەسی خاوەن نوسینگەگە و وە هەماهەنگی وەرد وەڕیەوبەرایەتی هاتوچو سلێمانی وازکریایە و لەو ماوە لەری سۆز و بەزەیی نیەنووڕنە پیان ئەرا وەدەسهاوردن مووڵەت رانندەیی".
سەرۆک کۆمەڵەگە داوا لە سەرۆک هەرێم کوردستان و سەرۆک وەزیرەیل هەرێم کەێد" پرۆژەی دابینکردن ماشین ئەرا کوڵەباڵایەیل بگرنە خوەیان، ک پرۆژەگە زیای کریەد وەبان دەسکەفتەیلیان ک شانازی وەپی کریەد".