عێراق پابەندبوونی خۆی بە بڕیارەكەی ئۆپێك پڵەس ڕاگەیاند

دیجیتال میدیای سپێده‌

وڵاتانی ئۆپێك پڵەس بڕیاریاندا ئاستی بەرهەمهێنانی نەوت كەمبكەنەوەو، عێراقیش پابەندبوونی خۆی بە بڕیارەكەی ئۆپێك پڵەس ڕاگەیاند.

دوای ئەوەی كۆبوونەوەی ئەندامانی ئۆپێك پڵەس لە ڤیەننا بەڕێوەچوو، تێیدا بڕیاریاندا بۆ ساڵی 2024 رێژەی بەرهەمهێنانی نەوت بۆ 40.46 ملیۆن بەرمیل كەمبكەنەوە، ئەمەش لەپێناو سەقامگیری بازاڕ و هاوسەنگی لەنێوان خواست و خستنەڕوو، هەروەها بەهۆی بەردوامی دابەزینی نرخی نەوت.

هاوپەیمانی ئۆپێك پڵەس لەڕاگەیەندراوێكدا بڵاویكردەوە، ئۆپێك پڵەس كە وڵاتانی ئەندامی ئۆپێك و وڵاتانی نا ئەندام لە ئۆپێك لەخۆدەگرێت، بە سەرۆكایەتی ڕوسیا، ڕێككەوتون لەسەر ئاستی ئامانجی نوێ بۆ بەرهەمهێنانی 40.46 ملیۆن بەرمیل لە ڕۆژێكدا كە لە سەرەتای ساڵی 2024ەوە دەستپێدەكات تا كۆتایی لە ساڵی 31ی (كانونی یەكەم/12)ی 2024.

لای خۆیەوە، وەزارەتی نەوتی عێراقیش لە راگەیەندراوێكدا ئاماژەی بەوەكردووە، بە هەماهەنگی لەگەڵ وڵاتانی بەشدار لە رێككەوتنی ئۆپێك پڵەس، عێراق بەردەوام دەبێت لەسەر كەمكردنەوەی بەرهەمهێنانی بڕی 211 هەزار بەرمیل نەوتی رۆژانە تاوەكو كۆتایی مانگی كانوونی یەكەمی 2024.