هەولێر-KDP.info- به‌ڕێز نێچیرڤان بارزانى، سه‌رۆكى هه‌رێمى كوردستان له په‌یوه‌ندیى ته‌له‌فۆنیدا له‌گه‌ڵ به‌ڕێزان وه‌زیرانى ناوخۆ و ته‌ندروستى، پارێزگارانى هه‌ولێر، سلێمانى، دهۆك و هه‌ڵه‌بجه و سه‌رپه‌رشتیارانى هه‌ردوو ئیدارى گهرمیان و ڕاپه‌ڕین، به‌دواداچوونى بۆ دوایین پێشهاته‌كانى په‌تاى ڤایرۆسى كۆرۆنا كرد.
ئه‌مڕۆ سێشه‌ممه 7/4/2020 سه‌رۆك نێچیرڤان بارزانى له په‌یوه‌ندییه‌كه‌دا له‌گه‌ڵ لایه‌نه به‌رپرسه‌كان، دوایین پێشهاته‌كانى بڵاوبوونه‌وه‌ى په‌تاى ڤایرۆسى كۆرۆنا و ڕێكاره‌كانى حكوومه‌ت و لایه‌نه په‌یونداره‌كانى بۆ ڕێگریكردن له بڵاوبوونه‌وه‌ى زیاترى په‌تاكه تاوتوێ كرد و له دۆخى پارێزگاكان و هه‌ردوو سنوورى گهرمیان و ڕاپه‌ڕین و به‌ڕێوه‌چوونى كاره‌كان و پێداویستى و كه‌موكورییه‌كان و كاریگه‌ریى ده‌رهاویشته و لێكه‌وته‌كانى په‌تاكه‌ى له‌سه‌ر ژیان و گوزه‌رانى هاووڵاتییانى هه‌رێمى كوردستانى پرسییه‌وه.
به‌ڕێز سه‌رۆكى هه‌رێمى كوردستان سوپاس و ده‌ستخۆشى له هه‌ردوو وه‌زاره‌تى ناوخۆ و ته‌ندروستى و پارێزگا و ئیداره‌كان و یه‌كه كارگێڕییه‌كان و پزیشكان و كارمه‌ندانى ته‌ندروستى و پێشمه‌رگه و ئاسایش و ته‌واوى هێزه‌كانى ناوخۆ و كارمه‌ندانى ده‌روازه سنوورییه‌كان و فڕۆكه‌خانه‌كان و هه‌موو ئه‌وانه كرد كه له به‌ره‌نگاربوونه‌وه‌ى په‌تاكه‌دا به‌شدارن و هه‌موو هه‌وڵێك بۆ كۆنترۆڵكردنى ده‌ده‌ن.
سه‌رۆك نێچیرڤان بارزانى هه‌روه‌ها سوپاسى هاووڵاتییانى كرد كه پابه‌ندى ڕێنماییه‌كانن بۆ خۆپاراستن و داواى كرد هه‌مووان تا ئه‌وپه‌ڕى به‌رده‌وام بن له پابه‌ندى و هاوكاریى هه‌وڵه‌كانى حكوومه‌ت بكه‌ن بۆ ڕێگریكردن له بڵاوبوونه‌وه‌ى زیاترى په‌تاكه، دووپاتیشى كرده‌وه كه ڕێكار و ڕێنماییه‌كان و پابه‌ندیى هاووڵاتیان تا ئێستا ئه‌نجامى باشى به‌ده‌سته‌وه داوه و هیواى خواست به هاوكاریى هه‌موو لایه‌ك ئه‌م دۆخه سه‌خته‌ش تێپه‌ڕێنرێت.