هەولێر-KDP.info- بەبۆنەی هاتنەوەی جەژنی قیامەی حەزرەتی مەسیح، نێچیرڤان بارزانی سەرۆكی هەرێمی كوردستان لە پەیامێكدا دووپات لە قووڵكردنەوەی كولتووری پێكەوەژیان و لێبوردەیی و یەكتر قبووڵكردن دەكاتەوە.
دەقی پەیامەكە:
هاتنه‌وه‌ى جه‌ژنى قیامه‌ى حه‌زره‌تى مه‌سیح سڵاوى خواى لێ بێت له ته‌واوى خوشك و برایانى خۆشه‌ویستى مه‌سیحى له هه‌رێمى كوردستان، عێراق و جیهان پیرۆز ده‌كه‌م، هیوادارم ئه‌م جه‌ژنه له‌گه‌ڵ خۆیدا سه‌لامه‌تى بۆ ته‌واوى مرۆڤایه‌تى بهێنێت و له په‌تاى كۆرۆنا و هه‌موو ده‌رد و نه‌خۆشییه‌ك دوور و پارێزراو بن.
ئه‌مساڵ جه‌ژنى قیامه له كاتێكدا دێته‌وه كه وه‌ك ته‌واوى جیهان هه‌رێمى كوردستانیش به‌هۆى په‌تاى كۆرۆناوه له دۆخێكى سه‌ختدایه و بۆ سه‌لامه‌تیى هه‌موو لایه‌ك ده‌بێ هه‌موومان پابه‌ندى ڕێنمایییه ته‌ندروستییه‌كان بین و له ماڵ بمێنینه‌وه، هیوادارین جه‌ژن و بۆنه‌كانى داهاتوومان له دۆخێكى باشتردا بكه‌ینه‌وه.
له‌م جه‌ژنه‌دا دووپاتى ده‌كه‌ینه‌وه كه وه‌ك هه‌میشه هه‌رێمى كوردستان بۆ هه‌موو پێكهاته ئایینى و نه‌ته‌وه‌یییه‌كانى به لانكه‌ى پێكه‌وه‌ژیان و لێبورده‌یى و یه‌كترقبووڵكردن و فره‌ڕه‌نگیى ئایینى و نه‌ته‌وه‌یى ده‌مێنێته‌وه و هه‌موو پێكه‌وه كار ده‌كه‌ین بۆ قووڵكردنه‌وه‌ى ئه‌م كولتووره‌ى جوانه‌ى كوردستان و ده‌یپارێزین.
جه‌ژنى قیامه له هه‌موو لایه‌ك پیرۆز بێت.
خواى مه‌زن هه‌مووان بپارێزێت.
نێچیرڤان بارزانى
سه‌رۆكى هه‌رێمى كوردستان
11/4/2020