رواندز-KDP.info- نیوەڕۆی ئەمڕۆ، فڕۆكە جەنگییەكانی توركیا زینی وەرتێی سەر بە قەزای رواندزیان بۆردوومان كرد، قایمقامی رواندزیش ئاشكرای كرد، زیانەكان نەزانراون، بەڵام بنكە و بارەگاكانی پەكەكە بە ھۆی بۆردوومانەكەوەوە خاپوور بوونە.
كوێستان ئەحمەد، قایمقامی رواندز، بە ماڵپەڕی فەرمیی پارتی دیموكراتی كوردستانی راگەیاند: "نیوەڕۆی ئەمڕۆ، فڕۆكە جەنگییەكانی توركیا ژمارەیەك ناوچەی سەر بە قەزای رواندزیان بۆردوومان كردووە و بۆردوومانەكەش ژمارەیەك بنكە و بارەگای پارتی كرێكارانی كوردستان "پەكەكە"ـی لە زینی وەرتێ كردووەتە ئامانج".
قایمقامی رواندز گوتیشی: "ئەو شوێنەی بۆردوومان كراوە، نزیكە لە بارەگاكانی ھێزی پێشمەرگەی كوردستان و تەنیا ٢٠٠ مەترێك لە پێشمەرگەوە دوور بووە، بەڵام پێشمەرگە زیانی بەرنەكەوتووە و تەنیا زیانی ماددی بەر تاوەرەكانی گەیاندن كەوتووە".
كوێستان ئەحمەد ئاماژەی بۆ ئەوەش كرد: "دوای كاتژمێر ١٢ی ئەمڕۆش، جارێكی دیكە فڕۆكە جەنگییەكانی توركیا چیای ھەلاموولییان لە كۆتایی زنجیرەچیای كارۆخ بۆردوومان كردووە، بێگومان ھەموو بۆردوومانەكانیش بۆ سەر بنكە و بارەگای پەكەكە بوون".
لەبارەی زیانەكانی پەكەكەوە، كوێستان دەڵێت: "ژمارەیەك گوندی سنوورەكە لە ژێر ھەژموونی پەكەكەدان و ئێمە زانیاریمان نییە سەبارەت بە زیانەكانی چەكدارانی پارتی كرێكاران "پەكەكە".
قائید میرۆ