سەرۆکوەزیرانی عێراق لە کۆنفرانسێکی رۆژنامەوانیدا رایگەیاند، ناردنی پارە بۆ مووچەخۆرانی هەرێمی کوردستان تاوەکو هەمواری یاسای بودجە بەردەوام دەبێت. ئەمڕۆ سێشەممە، 20ی شوباتی 2024، محەمەد شیاع سودانی، سەرۆکوەزیرانی عێراق لە کۆنفرانسێکی رۆژنامەوانیدا لەبارەی ناردنی پارە بۆ هەرێمی کوردستان گوتی "تاوەکو هەمواری یاسای بودجە، ناردنی پارە بۆ مووچەخۆرانی هەرێمی کوردستان بەردەوام دەبێت". گوتیشی "سەرقاڵی وردبینین لە هەموارکردنەوەی یاسایی بودجە و کێشەی کورتهێنان چارەسەر دەکەین". لەبارەی گرێبەستە نەوتییەکانی هەرێمی کوردستانی هەرێمی کوردستانیشەوە، سودانی گوتی "گرێبەستە نەوتییەکان تێچوو و نرخیان زۆرە، بۆیە پێویستە گۆڕانکارییان تێدابکرێت، بۆ ئەو مەبەستەش گفتوگۆ لەگەڵ تیمی راوێژکاران کراوە تاوەکو لە رەشنووسی هەمواری یاسای بودجە چارەسەری بۆ بدۆزرێتەوە"
دوا نوێکردنەوە: 2024-02-20 17:37:02 - سەرچاوە: کەناڵ8