هه‌ولێر-KDP.info- وه‌زیری گواستنه‌وه‌ی حكوومه‌تی هه‌رێمی كوردستان گوتی، له سبەیه‌وه خاوه‌نی ته‌كسییه‌كان ده‌توانن كار بكه‌ن، به‌ڵام به چه‌ند مه‌رجێك. جێگری پارێزگاری هه‌ولێریش ده‌ڵێ، هه‌رچی له ده‌ستیان بێت ئاسانكاری بۆ خه‌ڵك ده‌كه‌ن و ئێستا زۆرینه‌ی شوێنه‌كانیش كراونه‌ته‌وه.
ئانۆ جه‌وهه‌ر، وه‌زیری گواستنه‌وه‌ی حكوومه‌تی هه‌رێمی كوردستان له كۆنگره‌یه‌كی ڕۆژنامه‌وانیدا گوتی: "له ڕۆژی هه‌ینییه‌وه كه سبه‌یه خاوه‌نی تەكسییه‌كان ده‌توانن به‌پێی چه‌ند مه‌رجێك له‌ناو شاره‌كان ده‌ست به كار بكه‌نەوە و جارێ بۆ ده‌ره‌وه‌ی شاره‌كان پێویستیان به ڕه‌زامه‌ندیی وه‌زاره‌تی ناوخۆ هه‌یه."
گوتیشی: "ئه‌و ڕێنماییانه ته‌نها بۆ كاركردنی ته‌كسییه‌كانه و جارێ ڕێگه به كاركردنی مینیپاس و پاسه‌كان نه‌دراوه."
مه‌رجه‌كانیشی بریتین لە:
- ده‌بێت شۆفێران ماسك و ده‌ستكێش به‌كار بهێنن.
- ته‌نها ڕێگه به هه‌ڵگرتنی دوو سه‌رنشین ده‌درێت و ده‌بێت له كوشینی دواوه دابنشین.
- هیچ شۆفێرێك بۆی نییه هاتوچۆ به سه‌رنشینان بكات، ئه‌گه‌ر سه‌رنشینان ماسك و ده‌ستكێش به‌كار نه‌هێنن."
- كاركردنی تەكسی به شێوه‌ی تاك و جووت ده‌بێت بەپێی ڕۆژه‌كانی مانگ. بۆ نموونه له ڕۆژانی جووت، واتا ڕۆژی 24ی مانگ ژماره جووتەکانی (كۆتاییی ژماره‌ی ئۆتۆمبێل) و ڕۆژه تاكه‌كانیش ژماره تاكه‌كان ده‌توانن كار بكه‌ن."
- هاتوچۆی نێوان پارێزگاكان به ڕێگه‌پێدانی ئه‌لیكترۆنی وه‌زاره‌تی ناوخۆ ده‌بێت.
- شۆفێری تەكسی ده‌بێت به مادده‌ی پاككه‌ره‌وه ناو ئۆتۆمبێله‌كه‌ی پاك بكاته‌وه.
- ده‌بێت شۆفێران هه‌ر چوار جامی تاكسییه‌كانیان تا نیوه بكه‌نه‌وه ئه‌گه‌ر كه‌شوهه‌وا له‌بار بوو.
جێگری پارێزگاری هه‌ولێر، هێمن قادر، بە ماڵپه‌ڕی فه‌رمیی پارتی دیموكراتی كوردستانی گوت: "ئه‌وه‌ی له‌سه‌ر ئێمه بێت ئاسانكاری ده‌كه‌ین و ئێستا زۆرینه‌ی سێكته‌ره‌كان كراونه‌ته‌وه و به‌شێكی كه‌میان ماوه و ئه‌وانیش له ڕۆژانی داهاتوودا ده‌كرێنه‌وه."
هێمن قادر گوتیشی: "دوای ئه‌وه‌ی كه وه‌زاره‌تی ناوخۆ ڕێنماییی نوێی له‌باره‌ی درێژكردنه‌وه‌ی قه‌ده‌غه‌ی هاتوچۆ ده‌ركرد، ئێمه‌ش ڕێنماییه‌كانی خۆمان له‌باره‌ی ئاسانكاری بۆ سنووری هه‌ولێر بڵاو ده‌كه‌ینه‌وه."
بڵند ئیبراهیم