شەفەق نیوز/ دەسەڵات باڵای هەرلە “سوننە و شیعە” لە لوبنان دوو راپۆرت و سکاڵایگ دادوەری لە بان ئەکتەر کۆمیدی شادن فەقیه توومار کردن دویای پارچه ڤیدیۆیگ کە بویە قسەوباس گەورەیگ لەو وڵاتە.
شادن فەقیه لە سۆشیال میدیا رەخنەی فرەیگ لەلی گریا، ئەوەیش دویای بڵاوبوین پارچە ڤیدیۆیگ، لەناوی هەنەکی وە بەشیگ لە شیوەیل نماز موسڵمانەیل کەێد و رەخنە لە ئیمامەیل مزگەفت لە مەوقەی نماز گرێد.
فەقیه کە لە وڵاتیگ کە پەیوەندییە "ناسروشتیەیل" وە تاوان زانێد، ئاشکراس لە هاوڕەگەزبازییەگەی، وەو ویرەداریە ناسیاس لەو کلیپە کۆمیدییلە کە پیشکەشیان کەێدر فرەجار وشەیل قیزەون وەکار تیەرێد و کڕ سوور بڕێد لە نزیکبوین لە پرسە کێشەدارەیل، جویر ئایین و سێکس.
ئاژانس هەواڵ نیشتیمانیی لوبنان بڵاو کرد کە ئەمیندار فەتوا لە کۆمار لوبنان، شێخ ئەمین ئەلکوردی، وە پشتبەسین وە ڕێنماییەیل موفتی کۆمار لوبنان، شێخ عەبدوللەتیف دریان، راپۆرتیگ لەبان فەقیه توومارکردگە. وە “تاوانی سوکایەتیکردن و کوفرکردن وە شکومەنی ئیلاهی و پێغەمبەر محەمەد، زیانڕەسانن وە ئایین ئیسلامی راستەقینە و گاڵداین جەنگ مەزهەبی و شیوانن یەکێتی نەتەوەیی.”
ئەنجومەن باڵای ئیسلامی شیعەیل لوبنانیش لە ری نوێنەرەگەیەو، عەلی فایز ڕەحال، پارێزەر، سکاڵای تاوانکاری لەبان “شادن فەقیه” توومار کرد وە تاوانەیل کوفر وە ناو خودا و سووکایەتیکردن وە رسوومەیل ئایینی و گاڵداین جەنگ و رەگەزپەرستی.
هەمیش نوێنەر کۆمەڵەی ئیسلامی، عیماد الحوت، وە راپۆرتیگ لەبان شادن فەقیه هاتە وەرەو و لە بەیاننامەیگ وت: چوینکە ئازادی تاک لە سنوور ئازادی و مافی ئەوانەی ترەک وسیەێد، و لەوەر ئەوەگ ئازادی بەهایگ بیناکەرە و بەهایگ رمانن و زیانڕەسانن نییە وە ئەوەیل ترەک و بەهایل کۆمەڵگا، و لەوەر ئەوە کە لوبنان دەوڵەتیگە لە بنەمای بەهایل و دەوڵەت ئەرکەیل خوەی جیوەجی کەێد. (مادەی نوو دەستوور)، بڕیار دامە زانیاری لەبان ئەو ژنە بیەم وە ناو شادن فەقیه تا ئەو کارەیلە نەونە پیشینەیگ کە تەکان وە ئاێشتبوین سروشتی کۆمەڵگەی لوبنان بیەێد لە کۆمەڵگەیگ ئیمان و بەها وەرەو کۆمەڵگەیگ کە لە رەوشت دویرەو بکەفێد.