شەفەق نیوز/ سەرچەوەیگ ئەمنی لە پارێزگای زیقار، ئمڕوو جمعە، خەوەردا لە توومارکردن خوەیکوشتن دویەتیگ لەناوڕاس شار ناسریە.
سەرچەوەگە ئەرا ئاژانس شەفەق نیوز وت: دویەتیگ لەتەمەن 19 ساڵان وە پەتیگ خوەی دادە سێدارە و خوەیکوشت، ئەویش لەناو ماڵەگەی لە ناوچەی سەفینە ناڕاس شار ناسریە.
سەرچەوەگە دیاری کرد کە هیمان هوکار خوەیکوشتنەگە نادیارە، و تەرمەگەی ئەرا پزشک دادوەری بریا و لێکۆڵینەوە لە رویداوەگە واز کریا.
هەرلەیوا، سەرچەوەیگ لە پارێزگای کەرکوک خەوەردا کە دوو مەدەنی وە دوو رویداو جیاجیا زەخمدار بوین.
سەرچەوەگە ئەرا ئاژانس شەفەق نیوز وت: کابرایگ لەناو ئاهەنگ سویر لە ئاوای خبازە سەروە ناحیەی ریاز وە تفەنگ کلاشینکۆف تەقە کرد، و تفەنگ لەدەسی لارەو بوی و نزیکبوی بڕیگ بکوشێد، وەلێ یەک کەس زەخمدار کرد ئیجا توەنست بەرزیەو بکەێد.
سەرچەوەگە وتیش: هیزیگ پولیس رەسیە شوین رویداوەگە و زەخمدارەگە ئەرا خەسەخانە کلکرد، و کابرای تەقەکەر دەسگیر کرد و دەسنریا بان تفەنگ.
سەرچەوەیگ ترەک خەوەردا کە کابرایگ لە ئاوای بریج لە ناحیەی عەباسی لە کەرکوک لەناو بووسان ئاوایاری کردیاد، و کابرایگ تەقە لەلی کرد و زەخمدار بوی، وەلێ وەرجە وایین تەقەکەرەگە زەخمدارەگە ناسیەی کە یەکیگ لە کەسوکارەیل خوەی بویە.
دیاری کرد کە زەخمدارەگە ئەرا خەسەخانە بریا، و دەرکەفت کە وە گولەی پەڕان زەخمدار بویە، و بڕیار دەسگیرکردن تەقەکەر دەرچگ.