برادەری

كوڵە چیرووک 

سامان خەڵک خانەقین، کاریگ لە سلێمانی دیرێد، وە رزگار برادەری وت: وەگەردم بەو تا بچیمنە سلێمانی كار سێ رووژ دیرم، وخوازم تو وەگەردم باید.

رزگار وت: وەناو چەو، سوو وەیەکەو چیمن.

سامان زانێد کە برادەرەگەی پویل نەیرێد، و خوازێد رزگار وەرد خوەی ئەرا سلێمانی بوەێد، تا کەمیگ دڵی خوەشەو بوود، هەمیش تا بوودە هاودەنگی لەی سێ رووژە.

وەیەکەو رەسینە سلێمانی، و لە هوتێیلیگ جی گردن، و شەو وەیەکەو لەورا خەفتن.

شەوەکی سامان لەخەو هەڵسیا، دوینێد 100 دۆلار لەناو پویلەگەی گوم بویە.

سامان چەوەڕی کرد رزگار باێدە خەوەر، و هەناێ ئەویش لەخەو هەڵسیا وەپی وت؛ ئەری رزگار 100 دۆلار لەلیم گوم بویە، ئایا تو بردیدەسەی؟.

رزگار وەبی وسیانیگ وت: ئا من بردمەی، چوینکە کابرایگ لە سلێمانی پویل لەلامەو دیرێد، و شەو ناچار بویم لە تو بومەی و پویل ئەو کابرا گلەو بیەم.

سامان هویچیگ نەوت؛ هەڵسیان تا لە هوتێلەگە بچنە دەیشت، و خاوەن هوتێلەگە وە سامان وت: کاک سامان دویەکە وەختیگ پویل خەفتن هوتێل داید 100 دۆلار لە پویلەگەد زیای بوی، یەسە فەرموو پویلەگەد بووە.

سامان لە رزگار پرسی، ئەی ئەڕا وتید من بردمەسەی؟

رزگار وت: ئەگەر بوتام من پویلد نەوردمە، وەنە گومانیگ لەناو دڵد دروس بوی، و چەن ساڵیگ خوازێد تا ئەو گومانە پاکەو بوود.