شەفەق نیوز/ سەرچەوەیگ ئەمنی لە بەغداد، ئمڕوو جمعە، خەوەردا کە کابرایگ وتیە گوایە دویەتەگەی کە هیمان تەمەنی نەڕەسیەسە دە ساڵان دەرمان خواردیە و مردیە، تا دویای ئەوە دەرکەفت کە لەوەر شکەنجە و دەسوەشانن مردیە.
سەرچەوەگە ئەرا ئاژانس شەفەق نیوز وت کابرایگ وەناو (م. ع. ر) ئاگاداری لە بنکەی پولیس توومار کردیە کە وتیە گوایە دویەتەگەی وەناو (م. م. ع) لەداڵگبوی ساڵ 2015 دویای خواردن دەرمان گیانی لەدەسداگە.
وتیش: ئەرا گرنگی ئیجویر رویداویگ وەکوتپڕ ئەفسەر لێکۆڵینەوە رەسیە خەسەخانەی فورات و جیهاد ئەرا وەشکین تەرم قوربانیەگە، و دویای ئەوە دەرکەفت کە گشت شوینیگ لە لەشی زەخم و سزیان دیرێد، و لەوەر بەد خوەراکی لەشی لەڕەو بویە.
سەرچەوەگە دیاری کرد کە باوگ دویەتەگە دەسگیر کریا، و لە پرسیارکردن وتیە خوەی ئی تاوان قیزەونە جیوەجی کردگە کە وە گشت شیوەیگ شکەنجەی داگە، و لە بان خانگ ماڵەگە بەساسەی و لە ژیر ئی خوەر سویەرە وەبی ئاو و خواردن هیشتیەسەی.
باوگەگە وتیە ئی تاوانیە وەسنگ ئەوە کردیە کە دویەتەگە جموجویلی فرە بویە و مرافە وەرد ئەو مناڵەیل کردگە، و ئەرا زانیاری یە دویەت خوەیە لەو ژنەگەی کە لەلی جیاوە بویە، و ئی شکەنجە لەبان قسەی ژنە نووەگەی داگە کە هەمیشە وتیە ئی مناڵە فرە هارە.