شەفەق نیوز/ عودەی عەواد، ئەندام کۆمیتەی نەفتو وزەی پەڕلەمانی، ئمڕوو شەممە، توهمەتبار تیم حوکمەتی گفتوگۆکار ئۆپیک عیراقی کرد، ک کار ئەرا بەرژەوەنی لاینەیلیگ بیگانە کەێد.
عەواد ئەرا شەفەق نیوز وت: سیاسەت نەفتی عیراق، لە وەخت حكومەت عادل عبدولمەهدیەو، وە مەنین سامر غەزبان وەزیر نەفت، ومەنین گەنجەیلیگ بی ئەزمون لە کۆمپانیای سۆمۆ، شیواشیویگ بویه وکاریگەری خراویگ لە بان عیراق داشتیه.
ناوبریاگ هه‌میش وت؛ شکستەیل فرەیگ لەی کەیسە دوینیمن، ئەرا وە ك ئی تیم گفتوگۆکار عیراقیە ک وەزیرەگە وەل کۆمپانیای سۆمۆ هاناوی، کار ئەرا لاینەیلیگ بیگانە کردیه، وهەر بڕیاریگ بیریەێد بیگومان بەرژەوەنی عیراق لەناوی نیە. کەمەو کردن بەرهەم نه‌فت عیراق ئەرا ٢٣% چارەسەر نیە، به‌ڵكم قیرانەگە قویلترەو کەێد.
رۆیترز لە سەرچەوەیلیگ باس کرد ک لە چوارچێوەی رێککەفتن ئۆپیک وەل روسیا و بڕیگ خاوەن بەرهەم تر، نەفت عیراق زوور فره‌یه‌گ هابانی ئەرا کەمەوکردن بەرهەم وە ریژەیگ رەسێدە یەک مەلیۆن بەرمیل ئەرا یەک روژ لە مانگ ئایارەو وه‌لی بەغدا هیمان نەڕەسیەسە رێککەفتنیگ وەل کۆمپانیاییل جیهانی.
روژ جومعە، وزارەت نەفت عیراق، لە هه‌ناردن ٣،٤٣٨ مەلیۆن بەرمیل روژانە لە مانگ نیسان وەرین خه‌وه‌ر دا ك داهات پویلیگه‌ی رەسیە ١،٤٢٣ میلیار دۆلار.