کوڵە چیرووک
ئێڤ شارلێه، ژنیگ سەرمایەدار دەوڵەمەن، بیمارە، لە توو جی خەفتیە، شویەگەی دەرمانیگ دەێدە دەرخواردی، و ناکاوەو ئێف لەشی ئارام بوود و کەفێدە ئاسوودەیی خوەشیگ، لە توو شەوخەف هەڵسێد، تا دەسخوەشی لە شویەگەی بکەێد، کەفێدە مینەی شویەگەی، دوینێد شویەگەی باوش کردیەسە دویەتیگ، دەسکەێدە هاوار، کەسیگ دەنگی نیەژنەفێد، کەسیگیش وەپی نیەزانێد.
جاریگ ترەک، گلەو خوەێد ئەرا شەوخەفەگەی، نووڕێدە خوەی هیمان لە توو جی خەفتیە.
ئێڤ لەیرا وەخوەی زانێد کە خوەی مردگە، و گیانی ئازاد بویە، و ئەوە بوی کە کەسیگ لەلی ئاگادار نەوی، کە مەردم زنی ئاگا لە مردگەیل نەیرن.
ئێڤ دەنگیگ ژنەفێد، وەپی ئویشێد: بچوو ئەرا ماڵ توومارکردن مردگەیل.
ئێڤ کەفێدەو ری، پرسیار کەێد، کەسیگ پاپەی نییە، تا کەسیگ مردگ جویر خوەی دوینێد، وە ناو پیێر دۆمان، سەرکردەیگە لە کراکارەیل سۆشیالیست، مەوقەی پیشکەشکردن وتاریگ لەناو حزبەگەی، کابرایگ وە چەقوو کوشتەی.
ئێڤ و پیێر کەفنە ری، رەسنە ماڵ مردگەیل، ژنیگ چاخ ناویان نویسێد: ئێف شارلێه، شویەگەی ژەهرخوەری کردگە، پیێر دۆمان، وە چەقوو کوشیاس، بچنە ناو.
هەردوگیان چنە ناو ماڵ مردگەیل، کەسیگ نیەناسن، دەمەتەقەیگ وەیەکەو کردن، دووسی کەفتە ناوەینیان، وەلێ ماچیان بیتام بوی، یەکیگ لە شارەزایل ماڵەگە، چەوی وە پییان بوی، وت: ئیوە بەخت خاسیگ دیرین، تام دووسی نەینە، چوینکە لەبان زەوی دەسوەپی نەکریاس، یاسا شمارە 114 لە یاسایل ئاسمان، ری وەپیدان دەێد زنیەو بوین، و تا سەد ساڵیش ژیان بکەین، وەلێ وە مەرجیگ بتوەنین تا ماوەی 24 ساعەت دووسی بکەین، بچن ئەرا لای ژنە چاخەگە، و وەپی بویشن یاسای 114.
ئێڤ و پیێر چگن، و زنیەو بوین، پیێر هات ئەرا ماڵ ئێف کە لە ئاسمان دووسی بوی، هەردوگیان وەیەکەو چگن ئەرا ئاشخانەی «مەكسيم» لە پاریس، دەسکردنە خەنەخەن و سەما، دەنگ هاوار کراکارەیل لە دەیشت ئاشخانەو هات، کە ئویشن؛ پیێر خیانەت لە سۆشیالیست کەێد، چوینکە کەفتیەسە گەرد ئێڤ شارلێه، کە یەکیگە لە ناودیارەیل سەرمایەداری.
پیێر وە ئێڤ وت: یەک ساعەت هیلمەدە جی، تا بچم وە ئەندامەیل حزبەگە بویشم کە من دووسد دیرم، و تو هاوردمەسە ناو حزب سۆشیالیست، ئێڤ وت: منیش لەی ساعەتە چم تا کاریگ وەو شویە بکەم کە خیانەتم کرد، هەناێ لە توو جی مەرگ بویم، ژهەرخوەرم کرد.
ساعەت لەدویای ساعەت، پیێر سەری هاناو کاروبار حزبەگەی، ئێڤ سەری هاناو کاروبار شویەگەی، و وەپییان نەکریا یەک ساعەت دووسی وەیەکەو بکەن.
پیێر مرد، ئێڤ مرد، و هەردوگیان وە شەرم و پەشیمانی، کەفتنە وەردەم ژنە چاخەگە، لە ماڵ مردگەیل، داوا لەلی کردن یەی گلەی ترەک ری وەپییان بەێد، وەلێ ژنەگە وت: ئیوە شایستەی دووسی و ژیان نیین، ئیوە رەنگینترین چشتەیل ژیان وە مشتیگ خاک فرەتین.
- دی بازیەگە تەواو بوی.
چیرووک: جان پۆڵ سارتەر
ئەڵگەردان: ئاژانس شەفەق نیوز