شەفەق نیوز/ مەزەنە کریەێد پلەی گەرمی لە رووژیلە بەرزەو بوود، جویر شەپوول گەرمی نوویگ، یەیش لە هوچانیگ داوەزیان لە گەرمیەگەی حوزەیران گوزەشتەو، ئەرا زیاتر لە مانگیگ و یەکەم هەفتە لە ئاب لە هوچان داوەزیانی.
وەگورەی نەخشەیل کەشوهەوا، پلەی گەرمی روی وەرەو گەرمەوبوین کەێد لەماوەی 5 رووژ ئایندە، کە مەزەنە کریەێد پلەی گەرمی لەی رووژەیل کەم ئایندە بەرزەوبوین گەورەیگ وەخوەی بوینێد.
شارەزایل کەشوهەوا وتن؛ ئی بەرزەوبوینە و دە شەپوول گەرمی دریەێدە قەڵەم، چوینکە پەیمانەیل گەرمی، لە گشت ناوچەیل وڵاتەگە، لە ریژەی ئاسایی بەرزترەو بوود، و هاتێ بڕەسێدە 50 پلەی سەدی یا بەرزترەو بوود، لە چەن ناوچەیگ لە باشوور عراق.
لیست پلەی گەرمی لەلای دەسەی کەشناسی نشان دەێد کە بەرزترین پلەی گەرمی لە رووژ چوارشەممەو توومار کریەێد کە رەسێدە 48 پلەی سەدی لە میسان و بەسرە، و رووژ پەنجشەممە هەمیش لە میسان و بەسرە رەسێدە 49 پلەی سەدی، و لە زیقار و موسەنا و نەجەف رەسێدە 48 پلەی سەدی، و لەو پارێزگایەیل ترەک رەسێدە 47 پلەی سەدی، و لە دهۆک و سلێمانی رەسێدە 44 پلەی سەدی.
لەلاییگ ترەک، نشانەیل باس ئەوە کەن کە خوەرئاوا و باکوور وڵات لەناو مانگ ئەیلوول کەفێدە وەر واران و ئەور و بەڵاچە.