پاتورە و پەری

کوڵە چیرووک 

شەو سەردیگ، بلوورژەنیگ پیر، لە شار پرچگە بلوور ژەنێد، شوانەیل ئیڵ، گشت  لەدەوری گردەو بوین، تواستن بلووژەنی لەلی یای بگرن.

بلووژەن وت: ئمشەو ئەرادان مەقام پاتورەو پەری ژەنم، 

یەکیگ لە شوانەیل وت: ئەری هەی پیر زانا، پاتورەو پەری کی بوینە؟

بلووژەن یەکەم هەناسی کیشا، بلوور گردە دەس و کەمیگ بلوور ژەنی.

تەتگە و تەتان

لەناو کەلان

بەن وادەران

ئیکەش، بلوور لەدەم لاورد و وت: پاتورە یەکە کوڕ گەورە ماڵیگ، لە ناوچەی کرماشان بویە، باڵابەرز و خوەشئەنام، و ریکپووش، و شیکپوش، رووژیگ لە ری هەوڵ و کوچ ئیڵ، لە پاداوان شاخ بەرزیگ، ئەو و پەری، چەویان لەیەک کەفێد، دڵیان چوودەو یەک، وەبی قسیەی ترەک، لەیەک جیاوەو بوون، بەڵام، فکر و هویر پەری لە سەر پاتورە نیەدەرچوود، لە رووژان رووژیگ، داڵگ و باوکی چڕی، وهاڵ و هەکات ئەرایان ئویشێد، باوگ و داڵگ نارەهەت بوون و ئویشن؛ رووڵە، لە دویەتەیل ئاوای خوەمان، هەرکەس کلک نیشان بکەید، ئەراد خوازیمن و ماڵ و میلکان ئەراد هیزدەیمن، و هەرچی دارای دیریم ئەرای خوەد، پاتورە دڵ وەو قسیەیلە نیەنەێدەو، لە شەوەکیان وەهاری، ری وەبان گرێدە وەر، و پرسان پرسان، تا مەرز خانەقین، لە شوین ماڵ باوگ پەری ری کەێد، و لە دەم ئیاورەگانی وە دڵنگ شوانیەو، خوەی رەسنێدە قەڵا پەچیەی باوگ پەری، سەگەیل ئاوای هڵاماتی تیەرن، چەن پیاو و ژن لە رەشماڵەیل، تیەنەو دەر و پاتورە بەنە ماڵ، باوگ پەری، پاتورە وە دویاشوان نانە لەنگ گرێد، ساڵان فرەیگ تیەێد و چوود، پاتورە بوودە سەرشوان، هەر رووژ، پاتورە لە دویر و نزیک ئاوای بلوور ژنەێد، و پەری و. تڵقەتڵق مەشکە جوایەو دەێد، لەو ماوەی هەفت ساڵە، کەس پەی وەراز عشق پاتورە و پەری نیوەێد، و پاتورە وە دەنگ نەی، و پەری وە رپەی مەشکە، وەرد یەک قسیە کەن، و لەیەک خەوەر گرن، لە رووژان رووژیگ، پاتوورە چوودە ماڵ گەورەیل ئیڵ، و خوازمەنیکەر کل کەێدە ماڵ باوگ پەری، بەڵام باوگ پەری قەبوول نیەکەێد، و جواو ئەرای تیەێد، چەن ساڵ تر، هەم لیوا، تیەن و چن، پاتورە چەن جارە، خوازمەنیکەر کل کەێدە ماڵ باوگ پەری.

باوگ پەری، ئیجارە شەرتی نەی و ئویشێد: ئەگەر پاتورە ریەنەگە بوەێدە کویەی هەوماڵان، لە شوین چل رووژ، چاروەز ساوەرین نواکیش ریەن، بوود وە ئەنازەی گڵوەنی سەر پەری، ئی خوازمەنیە قەبوول کەم.

پاتورە قەبوول کەێد، و کەڕگ و کوڵەباڵ پووشێد، توشک ئامادە کەێد، و هەی کەێد لە ریەن.

شەو و رووژ، لە کویە و هاوارین، لە جیایل فرە پڕ گیا، ریەن لەوەڕنێد، و هەر رووژ چویزەی نەرمەوەن و چەویر تاش و گیای خوەش تام دەێدە ساوەرین، سی و نوو رووژ لەسەرشوینیەک، تیەن و چن، بەڵام لە چارەی چەفت پاتورە، لە رووژ چلم، تەیرە و یاخی دەور پاتورە و ریەن گرن، توان پاتورە بکوشن، و ریەن بوەن.

چەویان تیەێدە مل بلووریگا، کە وەدەس پاتورەو بویە، سەردزە ئویشێد: هەی شوان، بلووریگ ئەرامان بژەن تا نەکوشیمەد، پاتورە بلوور گرێدە دەس، و لە دویر نووڕێدە قوڕن رەشماڵ، دوید نان نیمەڕو لە زەمین وەرەو ئاسمان چوود، پەری لەناو دوو سیەماڵ، پەسا بەن پەیشت دەێد.

پاتورە بلوور ژەنێد

تەتگە و تەتان 

بەن وادەران 

لەناو کەلان 

پەری دەنگ بلوور شنەوی، و زانێد کە دز دەور پاتورە گرتگە، هاوار کەێد و هانا کەێد، و باوان چڕێد.

پاتورە ئەرا دزەیل بلوور ژەنێد، و لەناو هویرمان خوەی گوما دەێد، مەردم ئاوای چاتمەی دەور دزەیل دەن، و ریەن و پاتورە نجات پیا کەن.

پاتورە لە شوین چل رووژ، ریەن لە کویە تیەرێدە خوار، شاتەیل ئیڵ تیەن، سەر ساورەین بڕن، چاروەز ساوەرین و گڵوەنی سەر پەری، وەیەی ئەمانە بوینن، داڵگ و باوگ و باوان پاتورە تیەن و خوازمەنی کەن.

سویر پاتورە و پەری، هەفت رووژ وە درویژی کیشێد، دەنگ ساز و دهوڵ و هەڵپەرگە، لە گووش وڵات پەخش بوود.

فەرهاد عزەتیزادە