"بیماریە باوەگە" گەنجەیل خەێدە تەڵەی مردن ناکاوی

شەفەق نیوز/ توێژینەوەیگ دانیمارکی نوو، ئاشکرا کرد کە ئەو گەنجەیلە کە تویش بیماری شەکرە هاتنڵ، وەشیوەی گەورەیگ کەفتە وەر رخ مردن ناکاوی دڵ.

تاقی وەبان کەسەیلیگ کریا تەمەنیان لەناوەین 30 و40 ساڵە بویە کە بیماری شەکرە لە چین یەکەم دیرن، و کەفتە وەر رخدارییگ وە زیاتر لە 20 گلە لە مردن ناکاوی وەچەو ئەو کەسەیلە کە لەی تەمەنە بیماری نەیرن.

وەرانەور ئەوە، ئەو گەنجەیلە کە تویش بیماری شەکرە لە چین دویەم هاتنە، کە هەمیشە پەیوەندی وە زیایەی کیش لەش دیرێد یا کەمی لە گورجی لەش، شەش قات فرەتر  کەفتە وەر مردن ناکاوی دڵ.

رووژنامەی دەیلی مەیل بەریتانی وت: ئی ئەنجامەیلە گرنگی چەودیاریکردن هویرد ئەرا بیمارەیل شەکرە لە گەنجەیل کەێد.

پڕۆفیسۆر ئیلیجاه بیر، پسپۆڕە بیماریەیل دڵ لە خەسەخانەی سانت جۆرج لە زانکۆی لەندەن ئویشێد: وە ئاشکرا دیار نەوی چەنیگ کاریگەری بیماری شەکرە لەبان تەندروسی دڵ دیرێد، ئی ئەنجامەیلە رووشنایی خەنە بان خوازین چەودیاریکردن هویرد وەبان بیمارەیل شەکرە.

نزیکەی 4.4 ملیۆن کەس زیان لە بیماری شەکرە لە چین دویەم دیرن، و400 هەزار کەس لە چین یەکەم.