کوڵە چیرووک
لە ساڵان زۊ لە ئاوای داڵگیمان، دو سەره ژن گەورا بۊن کە دی کەیوانوو کردۊن و مناڵێگ لە دەورێیان نەمەنۊد ، شۊوەگانیانیش ئەمر خودا کردۊن . هەر دو کەیوانوو هاوناو بۊن و ناوێیان "جەمینە" بۊ.
یەی شەو لە شەوارەیل دریژ زمسان، یەکێگ لە کەیوانووەیل چێیە شەونشینی وە لای جەمینەی هاوناوێ ، هەڵبەت بنە قەومییگیش وە یەکەو داشتن .
کوڵ و کوڵبڕ بۊشم و سەرەدەردیدان نەیەم . نیشتنە دەنگ یەکەو و نخە و مەۊیژێگ خواردن و لەی هاران بێ گوڵە هەر وەتن و هەر وەتن . لە مناڵی و جوانی ، لە سۊر کردن و مناڵ پێیا بۊن تا دۊەت وە شۊ دان و ژن ڕا کوڕ خوازین ....
کاتێ لە شەوار چێ ، جەمینە وەت: خوەیشکە، بنیشیدە خوەش، من دی کەم کەم بچم ڕا ماڵ...
ئێ جەمینە وەت: مەگەر هیلم خوەیشکە !!! وەی شەوە وە تەنیا بچیدەو؟ وەلدا تیەم...
ــ خوو فرە خاس! تا ئەورە ئڕا خوەمان گەپ گوڕێگیش دەیمن!
کەفتنە ڕێیا و هە گەپ دان و نەزانسن کە چۊن رەسینە ماڵا ؟ هنایگ رەسینە ماڵ شەوە خوەشی یەکتر کردن و جەمینە تواس بایدەو.
ئێ جەمینە، تواس لە دەر ماڵ بچوودەو ناو ، کە یەی‌هەو وەت: ئای خوەیشکم باوانم بڕمێ، چۊن هیلم وە تەنیا بچیدەو ! وە گیان جوانەمەرگ وەلدا تیەم!
هەرچێ ئێ جەمینە وەت: "خوەیشکە قەسەم نەخوە" ، فایدە نیاشت.
کەفتنە ڕێیا و تا سفتەی سوو ئێ جەمینە ئەو جەمینە بردەو ، ئەو جەمینە ئێ جەمینە هاوردەو
چۊنەوگ دی لە وڵات ئێ چشتە بۊوە مەسڵەتێگ و هنایگ کەسێگ وەل کەس ترا فرە هامشوو بکرداد ، وەتن :
"جەمینە جەمینە کەن ".