شەفەق نیوز/ سەرچەوەیگ ئەمنی لە نەجەف، ئمڕوو جمعە، خەوەردا کە دوو سویر بویە کەلەمەی گەورەیگ رەسیە کوشتن برای زاوا، و دەسگیرکردن کەسیگ، ئەوەیش لەناوڕاس ناوەند پارێزگاگە.
سەرچەوەگە ئەرا ئاژانس شەفەق نیوز وت: رویداوەگە لە وەردەم هوتێل زەمزەم بویە لە شار کوینەی ناوڕاس نەجەف، کە باری زاوا وەشیوەیگ وەحشیانە دویای جەنگ و مرافەیگ وەرد سویریگ ترەک، لەبان ئەوە کە کامیان زویتر بچنە ناو هوتێل.
سەرچەوەگە دیاری کرد کە برا و باوک زاوا لە سویرە یەکەمەگە، وەگەرد چەن ژنیگ لە وەردەم دەروازەی هوتێیلەگە چەوەڕی زاوا و وەوی کەن بچنە ناو ژووریان لە هوتێلەگە، و لەی مەوقە سویریگ ترەک رەسیە ئەو شوینەر و داوا لە برای زاواگە کردن ری ئەرایان واز بکەێد.
برای زاواگە ز کەسەیلیگ وەگەردی رازی نەوینە شوینەگە چووڵ بکەن، و رک داشتنە سویر خوەیان یەکەم جارە بچوودە ناو هوتێلەگە، و لەبان ئیە بویەسە دەمەقاڵیان، تا هەشت کەس وەشکیانە برای زاواگە و سەری وە پارچە ئاسن (تایلیبەر) شکاننە تا گیانی لەدەسدا، و ئەوانیش وەرەو شوین نادیاریگ واینە.
سەرچەوەگە دیاری کرد کە هیزیگ ئەمنی رەسیە شوین رویداوەگە و تەرمەگە ئەرا پزشک دادوەری بریا، و توەنستن یەکیگ لە بکوشەیل بگرن، و مینەی ئەوەکان کەن.