شەفەق نیوز/ بوو گەن کبریت و تەم ئەرا ئاسمان بەغداد پایتەخت دووارە گلەو خوارد, لە وەختیگ شارەیلیگ لە ناوڕاس و خوەرهەڵات عراق داد لە دویکەڵ خەسیگ کردن کە یە چەن رووژیگە ئاسمان لەلییان پووشیە.
سەرچەوەیلیگ ئەرا ئاژانس شەفەق نیوز وتن: دویکەڵ و بوو کبریت کە هەمیشە بەشیگ بە ناوچەیل بەغداد پایتەخت پووشێد لە ئەنجام فڕەدان سزانن گەناڵخە لە ناوچەی موعەسکەر رەشید باشوور بەغداد تیەێد.
وەرجەیەیش هاوڵاتیەیل دەسکردنە داواکاری لە لایەنەیل حکومەتی لەباوت تەکان گاز لە سزانن گەناڵخە، لە ناوەین ناوچەی کەڕادە و زەعفەرانیە، کە کەفێدە گەردن ئەمیندارێتی بەغداد.
هەرلیوا، دویکەڵ خەس و تاسن ناوچەیلیگ لە باکوور بەغداد تا رەسێدە خوەرهەڵاتی تا پارێزگای دیالە وەرەو سنوور هەرێم کوردستان داگیر کردیە وەبی زانستن سەرچەوەگەی.
هاوڵاتییەیل لە قسەیان ئەرا پەیامنێر ئاژانس شەفەق نیوز داوا کردن لایەنەیل حکومەتی دەسبیەنەوەر ئەرا مسۆگەرکردن نەمان ئی دویکەڵە، لەناو هوشداری لە تویشهاوردن وە بیماریەیل رخداریگ.