نێردەی نەتەوە یەکگرتووەکان لە ئەفغانستان ڕۆژی سێشەممە وتی تاڵیبانی فەرمانڕەوا لە دوای گرتنەوەی دەسەڵات لە ئەفغانستان بە شێوەیەکی زۆرەملێ 256 جار ڕۆژنامەنووسانییان دەستگیر کردووە. هەروەها داوای لە بەرپرسانی ئەفغانستان کرد میدیا بپارێزن. لە وەڵامێکدا کە لەگەڵ ڕاپۆرتەکەدا هاتووە، تاڵیبان ڕەتی دەکاتەوە ئەو ژمارەیەی لە ڕۆژنامەنووسان دەستگیر کردبێت و وتی ئەوانەی دەستگیر کراون تاوانییان ئەنجام داوە. نێردەی نەتەوە یەکگرتووەکان لە ئەفغانستان ( یوناما ) و ئۆفیسی مافەکانی مرۆڤی نەتەوە یەکگرتووەکان لە بەیاننامەیەکدا وتییان ڕۆژنامەنووسان لە ئەفغانستان " لە هەلومەرجێکی سەختدا " کارییان کردووە. ڕۆزا ئۆتوباییڤای نوێنەری تایبەتی سکرتێری گشتی نەتەوە یەکگرتووەکان ئەنتۆنیۆ گۆتیرێش وتی " ڕۆژنامەنووسان زۆرجار ڕووبەڕووی یاسای ناڕوون دەبنەوە لەسەر ئەوەی ڕاپۆرت لەسەر چی بکەن و ڕاپۆرت لەسەر چی نەکەن، لە ژێر مەترسی ترساندن و دەستبەسەرکردنی زۆرەملێدان لەسەر ڕەخنەگرتن." وتیشی " داوا لە بەرپرسانی نافەڕمی دەکەین دڵنیا ببنەوە لە پارێزراویی و ئاسایشی سەرجەم ڕۆژنامەنووسان کارمەندانی میدیاکان لە کاتێکدا کە کارەکانی خۆیان ئەنجام دەدەن، هەروەها داوایان لێدەکەین بە تەواوەتی دان بنێن بە گرنگی کارکردنی ژنان لە میدیاکاندا." وەزارەتی دەرەوەی تاڵیبان لە وەڵامدا وتی ئەو ژنانەی کە بەردەوام لە میدیاکاندا کاردەکەن دەبێت پابەندی چەند یاسایەکی ئەخلاقی ئایینی بن، لەوانەش داپۆشینی ڕووخسارییان و جیاکردنەوەیان لە کاتی کارکردندا لەگەڵ پیاواندا. وتیشی ڕاپۆرتەکەی نەتەوە یەکگرتووەکان " زۆر دوورە لە ڕاستییەوە " و هێزەکانی ئاسایش کاردەکەن بۆ پاراستنی ڕۆژنامەنووسان. وتیشی " هیچ کەسێک بە زۆرەملێ دەستگیر نەکراوە." ئەوانەی کە دەستگیر کراون هانی خەڵکییان داوە دژی سیستمەکە بجووڵێنەوە، حکومەتییان لکەدار کردووە و ڕاپۆرتی بێ بنەما و هەڵەیان بڵاوکردووەتەوە، ئەوەش لە پێناو هاوکاریکردن لەگەڵ دوژمنانی سیستمەکە لە میدیادا و دابینکردنی بابەت بۆ دەزگا میدیاییەکان دژی سیستمەکە. تاڵیبان لە ساڵی 2021 دا دەسەڵاتی ئەفغانستانی گرتەوە دەست لە کاتێکدا کە هێزە بیانییەکان لەو وڵاتەدا کشانەوە، بەڵێنیدا ئاسایش بگەڕێنێتەوە بۆ وڵاتەکە و یاسای ئیسلامی جێبەجێ بکات. بەڕێوبەرایەتییەکەی تاڵیبان لە ئەفغانستان لەلایەن هیچ وڵاتێکی بیانییەوە دانی پێدانەنراوە و دیبلۆماتکارانی ڕۆژئاواش دەڵێن کارەکانی تاڵیبان بۆ سەپاندنی کۆتوبەند بەسەر ژناندا بووەتە بەربەست لەبەردەم دان پێدانان بە حکومەتەکەیدا. سەرچاوە/ ڕۆیتەرز