شەفەق نیوز/ سەرچەوەیگ ناوخوەیی لە نەجەف، ئمڕوو پەنجشەممە، خەوەردا لەماوەی 48 ساعەت وەرین 4 حالەت خوەیکوشتن توومارکریاس لە پارێزگاگە، و کوشیان دویەتیگ لەئەنجام مەرافیگ چەکداری لە پارێزگای دیوانیە، کەسیگ گیان لەدەسدا و دوانیش زەخمداربوین لە ئەنجام رویداویگ هاتوچو لە دیالە.
سەرچەوەگە وە ئاژانس شەفەق نیوز وت، "هێزە ئەمنیەیل چوار حالەت خوەیکوشتن گەنجەیل و پیای وەتەمەنیگ لە ناوچەی قەورسان وادی سەلام توومارکردنە لە قەزای کوفە، و ناحیەی حوریە لە نەجەف لەماوەی 48 ساعەت گوزەشتە".
وتیش؛ "بیماری دەروینی و هەوەجەی مادی هووکار پشت رویداوەیل خوەی کوشتنەیل بوینە".
لە دیوانیە سەرچەوەیگ راگەیان "دەمەقاڵی ناوەین دوو لایەن رەسیە ئەرا تەقەکردن لەیەکتر لە قەزای حەمزا خوەرهەڵات پارێزگای دیوانیە، بوە هووکار دویەت بیس ساڵانیگ" وتیش "هێزە ئەمنیەیل ئاخڵەی شوین رویداوەگە دانە و تاوانبار رویداوەگە دەسگیرکردنە دەسوەجی تەقەکردیە".
لە دیالە سەرچەوەیگ ئەمنی وە ئاژانس شەفەق نیوز خەوەردا لە مردن کەسیگ و زەخمداری دوو کەس وە رویداو هاتوچوی لەبان ری بەغداد ـ کەرکوک نزیک قەزای خاڵس لە دیالە، لە ئەنجام لەیەکەوداین بارهەڵگریگ گاز وەرد ماشینیگ لە ئەنجام رانندەگەی گیان لە دەسدا و دوو کەسیش زەخمداربوی.