شەفەق نیوز/ وەرپرسیگ حکومەتی عراقی، ئمڕوو چوارشەممە، وت: سەردان محمد شیاع سودانی سەرۆک وەزیرەیل ئەرا ئوردن لە چوارچیوەی جویلەکردنیگ لە عراق تیەێد لەباوەت رەوشەیل ناو سوریا.
ئەو وەرپرسە ئەرا ئاژانس شەفەق نیوز وت: سەردان سودانی زوور لەبان هەماهەنگی هەڵوێست و نووڕینەیل عەرەبی و هەرێمی تیەێد، وەتایبەت لەسای ئاڵشتبویەیل زویوەزوی لەباوەت سوریا و رمیان رژیم بەشار ئەسەد.
سودانی ئمڕوو وە سەردانیگ کە ئاشکرا نەکریاس، رەسیە ئوردن، و چەوی کەفتە شا عەبدوڵای سانی، کە باس گەشەیل ئیسە لە ناوچەگە کردن، و رویداوەیل لە سوریا.
سیمای نوویگ لە سوریای هاوسای عراق زاڵەو بوود، وەگەرد کۆتایی رژیم بەشار ئەسەد، و کۆنترۆڵکردن وڵاتەکە وەلایەن باڵە چەکدارەیل ئۆپۆزسیۆن، دویای پەلاماریگ زویوەزوی کە تا ماوەی 11 رووژ وەردەوام بوی، کە کۆتایی وە حکومڕانییگ 24 ساڵە هاورد، و سەردەمیگ تا نزیکەی 6 دەیە وەردەوام بوی.
وەرپرسەیل لە عراق، رخییگ دیرن وەرانوەر ئەو ئاڵشتبوینە لە سیما سوریا، وەتایبەت وەگەرد زاڵبوین باڵەیل ئۆپۆزسیۆن لەبان دەسەڵات، کە ریخریایەیلیگ تونەڕەوی هاناویان، جویر جەبهەی نوسراوی وەرین ولایەنەیلیگ ترەک.
ئەو رخەیلە پەیوەندی وە رەسین کاریگەری جەنگ و ململانێی سوریا ئەرا ناو عراق دیرن، وە بەرزەوبوین جموجویل چەکداری وە درویژایی سنوور وەرد عراق، کە هیشت عراق پاڵپشتیکردن سەربازی گەورەیگ کل بکەێد.
دەسەڵاتەیل عراق رخیان لەوە چووک کە رمیان رژیم ئەسەد بۆشاییگ ئەمنی دروس بکەێد، کە هاتێ ریخریاگەیل تونەڕەوی خوەیان لەناوی قایم بکەن.