شەفەق نیوز/ فەرماندەیی پولیس بەغداد - رەسافە، ئمڕوو دووشەممە، دەسگیرکردن خوەنەواریگ راگەیان کە دروشمەیل داعش لەناو مەکتەویگ لە ناوچەی زاعفەرانیە باشوور خوەرهەڵات بەغداد نویساس.
پولیس لە بەیاننامەیگ رەسیە ئاژانس شەفەق نیوز وت: بەش پولیس زاعفەرانیە لە ساعەت 12ی نیمەڕو ئاگاداری وەرگرد لەبان دروشمەیلیگ لەناو مەکتەو (ئامادەیی نەجاح) لە قات دویەم لەناو یەکیگ لە پۆلەیل کە نویسیاس "لا إله إلا الله محمد رسول الله".
بەیاننامەگە وتیش: وەکوتپڕ تیم کارکردن لە بەش پولیس زاعفەرانیە دروس کریا، وە هاوکاری پولیس فیدڕاڵی.
دیاری کرد کە لایەنەیل پەیوەندیدار توەنستن توومەتبار وەو کارەیلە دەسگیر بکەن، دویای وەشکین و گردەوکردن زانیاری، وتیش لە لێکۆڵینەوە ئاشکرا کرد کە وەشەو چگەسە ناو مەکتەوەگە و ئەو دروشمەیلە لەقەی دیوارەیل پۆلەیل نویساس.
فەرماندەیی پولیس دووپات کرد کە وەردەوامە لە وەشوینکەفتن ئیجویر کارەیلیگ ئەرا مقیەتیکردن ئاسایش و ئارامی دامودەزگایل پەروەردە.
هەمیش فەرماندەی ئۆپراسیۆنەیل بەغداد دەسگیرکردن توومەتباریگ وە نویسانن دروشمەیل ریخریاگ داعش لەناو مەکتەویگ لە باشوور زاعفەرانیە راگەیان.
لە بەیاننامەیگ رەسیە ئاژانس شەفەق نیوز وت: دویای بڵاوبوین خەوەریگ لەبان نویسانن دروشمەیل ریخریاگ داعش تیرۆرست لەناو مەکتەویگ لە زاعفەرانیە، وەکوتپڕ تیم کارکردن هاوبەش دروس کریا، کە توەنستن وە وەختیگ پەیمانەیی توومەتبارەگە دەسگیر بکەن، وتیش: لە وەختیگ ئایندە هویردەکاریەیل بڵاو کریەن.
شەوەکی ئمڕوو دووشەممە، سەرچەوەیگ ئەمنی ئەرا ئاژانس شەفەق نیوز وت: نویسانن دروشمەیل ریخریاگ داعش لەقەی دیوارەیل مەکتەویگ لە زاعفەرانیە دەرکەفتیە، و هیزەیل ئەمنی زویوەزوی رەسینە شوین رویداوەگە و ئەو دروشمەیلە سڕینەو، و کەفتنە شوین کامیرایل چەودیاریکردن.
ئی رویداوە دویای یەک هەفتە لە بەرزکردن پەرچەم داعش لەبان مەکتەوەیگ لە کەرکوک، و رویداویگ وەیجویرە لە حەویجە نیەێد، کە وە دەسگیرکردن توومەتبارەیل کۆتایی هات.