شەفەق نیوز/ بەغداد پایتەخت و پارێزگای میسان لە باشوور عراق، شەفەق ئمڕوو دووشەممە، دوو رویداو ئاگر جیاجیا توومار کردن، بەیتە هوکار زەخمداری عەمیدیگ لە دەزگای ئاسایش نیشتمانی، و مردن داڵگ و دویەتیگ.
سەرچەوەیگ ئەمنی لە بەغداد ئەرا ئاژانس شەفەق نیوز وت: ئەفسەریگ وەپلەی عەمید لە دەزگای ئاسایش نیشتمانی لە ئەنجام رویداویگ ئاگر مەوقەی کارکردن لە بتوڵیگ گاز لەناو گەراج ماڵەگەی لە ناوچەی حوریەی بەغداد زەخمدار بوی.
دیاری کرد کە زەخمدارەگە ئەرا خەسەخانەی مازمیە بڕیا و لایەنەیل ئەمنی دەسکردنە لێکۆڵینەوە.
لە پارێزگای میسان، ئاگر گەورەیگ لەناو ماڵیگ لە ناوچەی حەی حوسەین ناوڕاس شار عمارە، بویە هوکار مردن داڵگیگ وەگەرد دویەت بوبچگی لەناو ماڵەگە.
سەرچەوەگە ئەرا ئاژانس شەفەق نیوز وت: تیمەیل ئاگرگپەوکردن و فریاکەفتن رەسینە شوین رویداوەگە و ئاگرەگە کپەو کردن و تەرمەیل دراوردن و ئەرا پزشک دادوەری بریان، و لایەنەیل پەیوەندیدار لێکۆڵینەوە ئەرا رەسین وە بندروس رویداوەگە واز کردن.