شەفەق نیوز/ دەسەی کەشناسی عراق، ئموو دووشەممە، مەزەنەکرد کەشەگە لەناوەین ساماڵ و ئەورە وەگەرد بڵاوبوین تەم و ئاڵشتبوین پلەی گەرمی لە ماوەی رووژەیل ئایندە.
دەسەگە لە بەیاننامەیگ رەسیە ئاژانس شەفەق نیوز راگەیان، مەزەنە کرێد سوو سێشەممە ئاسمان لە ناوچەیل ناوڕاس و باشوور ساماڵ بوود و لە باکوور ئەورە، وەگەرد بەرزەوبوین کەمیگ پلەی گەرمی وەگەرد وای باکوور خوەرئاوا.
دەسەگە دیاریکرد کەمترین پلەی گەرمی لە بەغدا 5 پلەی سەدیە، و مەزەنەکەێد بەرزترین پلەی گەرمی 16 پلە بوود.
دیاریکرد، رووژ چوارشەممە وەگشتی کەش ساماڵە وەگەرد بڕیگ ئەور، و دروسبوین تەم لەوەخت شەوەکی، و لەناوچەیل ناوڕاس پلەی گەرمی نزیکە لەتوومارەیل گوزەشتە و لە ناوچەیل باکوور داوەزێد و لەباشوور بەرزەوبوود.
مەزەنەکرێد رووژ پەنجشەممە ئەور بوود وەگەرد پلەی گەرمی نزیکە لەتوومارەیل گوزەشتە لە ناوچەیل باشوور و لە باکوور و ناوڕاس بەرزەوبوود.